Qazaqstan halyq banki uıaly telefondarǵa arnalǵan jańa qosymshany iske qosty
ATY. 8 maýsym. QazAqparat /Erlik Erjanuly/ - Búgin Almatyda «KaR-Tel» JShS men «Qazaqstan halyq banki» AQ uıaly telefondarǵa arnalǵan jańa «Halyk-Beeline» qosymshasyn iske qosqanyn habarlady.
Bul Qazaqstan naryǵyndaǵy jańa qyzmet túri bolyp otyr. Ol banktiń tólem kartalaryn ustaýshy bolyp tabylatyn baılanys operatorynyń abonentterine Qazaqstan aýmaǵynda uıaly baılanys, kabeldi televıdenıe men kommýnaldy qyzmetter salasyndaǵy 50-den astam saýda-qyzmet kórsetý kásiporyndarynda tólem jasaýǵa múmkindik beredi.
«Abonentter esh qıyndyqsyz Halyq bankiniń tólem kartasynan ekinshi tólem kartasyna, VISA tólem kartasynan VISA júıesiniń ózge tólem kartalaryna aýdarymdar jasaı alady. Sondaı-aq bank kartasy boıynsha teńgerim, operatsııalar tarıhy, bereshek sııaqty málimetti kórýge qol jetkizedi», - deıdi «Qazaqstan halyq banki» AQ Basqarma tóraǵasynyń orynbasary Asqar Smaǵulov. Al «KaR-Tel» JShS-niń Marketıng jónindegi dırektory Aınur Ábjanovanyń aıtýynsha, Qazaqstan naryǵyndaǵy jańa qyzmet túri kez-kelgen ýaqytta, kez-kelgen jerde tólem kartasy jáne mobıldi bankıng arqyly tólem jasaýǵa múmkindik beredi. Jańa qyzmet boıynsha bank pen uıaly baılanys operatorynyń klıentteri endi ózderine qolaıly ýaqytta mamandardyń kómegine júginbeı jáne bank bólimshesine kelmeı-aq, operatsııalardy júzege asyra alady. Ol J2ME Java-tehnologııasyn qoldaıtyn barlyq telefondar arqyly qoljetimdi. Al Windows Mobile OS, Android OS, Apple iOS júıeleri arqyly qyzmet jasaıtyn telefondardarda jaqyn arada iske qosylady. Ony baılanys kompanııasynyń saıty men portalynan tegin júktep alýǵa bolady.
