Qazaqstan halyq banki Basqarma tóraıymy qarjy atalymy boıynsha «Ajar» ulttyq syılyǵymen marapattaldy
ALMATY. 29 qarasha. QazAqparat - «Qazaqstan halyq banki» AQ-nyń Basqarma tóraıymy Úmit Shaıahmetova «Qarjy» atalymy boıynsha Qazaqstan áıelderi jetistikteriniń qoǵam tarapynan moıyndalýyn pash etetin «Ajar» ulttyq marapatyna ıe boldy. Bul shara III Eýrazııalyq áıelder sammıti sheńberinde júzege asty.
Ony QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń qoldaýymen «Qazaqstan isker áıelderiniń qaýymdastyǵy» respýblıkalyq qoǵamdyq birlestigi uıymdastyrǵan bolatyn. Onyń negizi maqsaty - Eýrazııalyq keńistiktegi qoǵamdyq-saıası jáne ekonomıkalyq damýǵa áıelderdiń qosatyn úlesin pash etý. Qarjy ınstıtýtynyń baspasóz qyzmetiniń habarlaýynsha, bul sammıtke Qazaqstannan jáne Katar, Izraıl, Reseı, Belarýs, Ýkraına, Bashqurtstan, Ózbekstan men Qyrǵyzstannan 50-den astam ókil qatysty.
Qazaqstan áıelderi jetistikteriniń qoǵam tarapynan moıyndalýyn pash etetin «Ajar» Ulttyq marapaty Qazaqstan áıelderiniń basty qoǵamdyq syılyǵy bolyp tabylady. Jalpy Úmit Bolathanqyzy Shaıahmetova Qazaqstannyń júıe qurýshy bankiniń Basqarma tóraıymy qyzmetin 2009 jyldyń 21 qańtarynan beri atqaryp keledi. Buǵan deıin 2006 jyly «Eren eńbegi úshin» medalimen jáne 2011 jyly «Parasat» ordenimen marapattalǵan bolatyn.
