Qazaqstan halyq ártisi Roza Rymbaeva óz tańdaýyn jasady

ALMATY. QazAqparat - Qazaqstan halyq ártisi, Memlekettik syılyqtyń laýreaty, ánshi Roza Rymbaeva saılaýda daýys berdi, dep habarlaıdy QazAqparat tilshisi.

Búgin QR Ulttyq kitaphanasynda ornalasqan №254 saılaý ýchaskesine ataqty ánshi azamattyq belsendiligin tanytýǵa keldi.

«Qazaqstannyń ár azamaty óz tańdaýyn jasaýy kerek. Ár jańa basshy óz baǵdarlamasyn jasaıdy, el bolashaǵyna óz baǵytyn beredi. Biz - halyq, basshylyqtyń jasaǵan baǵdarlamasyna qoldaý bildiremiz. Ári nátıje kútemiz. Prezıdenttikke kandıdat azamattardyń barlyǵynyń negizgi maqsaty memleketti, halyqty jaqsy ómirge jetkizý, ómirimizdi jaqsartý. Halyq tańdaǵan azamat búgin jeńedi dep oılaımyn», - dedi Roza Rymbaeva.

Ánshiniń balalary da tańerteńnen saılaý ýchaskelerine ketken.

«Meniń uldarym Temirbek Júrgenov atyndaǵy Óner Akademııasynda ornalasqan ýchaskede daýys berip jatyr. Men azamattardyń barlyǵyn jaqsy bilemin dep aıta almaımyn. Biraq, keıbireýleriniń baǵdarlamasyn tolyq oqyp shyqtym, jeke de tanyspyn. Sol adamǵa daýys berdim», - dedi ánshi.

Aımaqtyq saılaý komıssııasynyń tóraıymy Janna Asanovanyń aıtýynsha, qalada 554 saılaý ýchaskesi ashylǵan. Saılaý ýchaskelerinde 1 mln-ǵa jýyq Almaty turǵyny tizimdelgen.

«Ózderińiz baıqaǵandaryńyzdaı, belsendilik óte joǵary. Keshke deıin azamattardyń saıası belsendiligi budan da arta túsedi dep oılaımyn», - dedi ol.

Qalaǵa 80 halyqaralyq baqylaýshy keldi.

Buǵan deıin Almaty ákimi Baýyrjan Baıbektiń daýys bergenin habarlaǵan bolatynbyz.

Qala boıynsha búginde 1 mıllıon 130 myń 792 saılaýshy tirkelgen.
Eske sala ketsek, búgin Qazaqstan Prezıdentin kezekten tys saılaý bastaldy. QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys isteıdi. Saılaý týraly Konstıtýtsııalyq zańǵa sáıkes, daýys berý ýaqyty standartty (saǵat 7.00-20.00 aralyǵy) bolady.