Qazaqstan halqynyń turmys-tirshiligine arnalǵan fotobaıqaý jarııalandy
ASTANA. Sáýirdiń 22-si. QazAqparat /Rýslan Ǵabbasov/ - «Qazaqstan - bizdiń ortaq úıimiz» atty respýblıkalyq aktsııa bastaldy.
Sonyń aıasynda bir shańyraq astynda beıbit ómir súretin elimizdegi barsha etnostyń birligine arnalǵan fotobaıqaý ótkiziledi, dep habarlaıdy QazAqparat.
«Bul shara respýlıkalyq deńgeıde uıymdastyrylady. Fotobaıqaýdyń qorytyndysy boıynsha úzdik jumystar Internette fotokórme túrinde «Jas Otan» JQ-nyń resmı saıtynda kópshiliktiń nazaryna usynylatyn bolady»,-dedi «Nur Otan» HDP «Jas Otan» JQ-nyń atqarýshy hatshysy Nurlan Óteshev.
Onyń sózine qaraǵanda, fotokórme Qazaqstan halqynyń turmys-tirshiligin, ózara syılastyq pen dostyqtyń, beıbitshiliktiń jáne yntymaqtastyqtyń negizinde quralǵan etnosaralyq qatynastardy beıneleý ıdeıasyna negizdelgen.
Baıqaýdy ótkizý eki kezeńge bólinedi. Birinshisi aımaqtyq deńgeıde erteńnen bastap mamyrdyń 15-i aralyǵynda ótkiziledi. Osy kezeńde «Jas Otannyń» aımaqtyq fılıaldary jalpy fotosýretter men birge tapsyrylatyn qujattardy jınaqtalýy jumystarymen aınalysady. Odan ári barlyq fotosýretter mamyrdyń 15-ine deıin «Jas Otan» JQ-nyń atqarýshy hatshylyǵyna jınaqtalady. Sodan keıin mamyrdyń 20-sy kezinde qurylǵan komıssııanyń otyrystary ótkiziledi. Osynyń aıasynda taqyrypty ashatyn sýretter iriktelip, avtorlary marapattalatyn bolady. Baıqaýǵa qatysatyn fotosýretshilerdiń jas aralyǵyna shekteý qoıylmaıdy. Sharany «Nur Otan» HDP «Jas Otan» jastar qanaty uıymdastyryp otyr.
