Qazaqstan halqynyń tilder kúnine arnalǵan onlaın-dóńgelek ústel ótti

NUR-SULTAN. QazAqparat - Aǵymdaǵy jylǵy 3 qyrkúıekte Qazaqstan halqynyń tilder kúnine arnalǵan «Til mártebesi – el mártebesi» onlaın-dóńgelek ústeli ótti, dep habarlaıdy QazAqparat.

Dóńgelek ústel jumysyna Qazaqstan halqy Assambleıasy Tóraǵasynyń orynbasary – Hatshylyq meńgerýshisi M. Ázilhanov, QR Parlamenti Májilisiniń depýtaty N. Dementeva, QHA músheleri, etnomádenı birlestikterdiń basshylary men músheleri, ǵylymı jáne shyǵarmashylyq qaýym ókilderi, etnomádenı birlestikterdiń jastary, QHA «Jańǵyrý joly» RJQ jáne BAQ qatysty.

Іs-sharanyń maqsaty – til mádenıeti men jalpy adamzattyq rýhanı qundylyqtar qaǵıdattaryna negizdelgen qoǵamdyq kelisim men jalpyulttyq birlikti, qazaqstandyq biregeılikti, toleranttylyq pen ózara túsinistikti nyǵaıtý jáne damytý.

QHA Tóraǵasynyń orynbasary Marat Ázilhanov óziniń alǵy sózinde QR Prezıdentiniń jańa Joldaýynyń mańyzdylyǵy týraly aıtyp, Memleket basshysynyń til saıasatyna basymdyq bergenin nazarǵa aldy. Sondaı-aq, ol táýelsizdiktiń alǵashqy jyldarynan bastap respýblıkada búkil Qazaqstan halqynyń múddelerin eskeretin, eldiń barlyq etnostarynyń tildik quqyqtarynyń saqtalýyn qamtamasyz etetin úılesimdi til saıasaty júrgizilip kele jatqanyn atap ótti.

Dóńgelek ústel barysynda qatysýshylar qazirgi tańda ár túrli etnostyń kóptegen jastary qazaq tilinde sóıleıdi degen pikirlerin bildirdi.

Onlaın-konferentsııa barysynda respýblıkalyq etnomádenı birlestikter men QHA óńirlik qurylymdarynyń ókilderi memlekettik til saıasatyn júzege asyrý tájirıbesimen bólisip, Qazaqstandaǵy tilderdi damytýdyń ózekti máselelerin talqylady.

QHA qoǵamdyq qurylymdarynyń qyzmeti jaǵdaıynda til saıasatyn odan ári damytýdyń negizgi baǵyttary boıynsha qyzyqty pikir almasý boldy.