Qazaqstan halqynyń sany jylyna 265 myń adamǵa kóbeıse, ol biz úshin úlken qýanysh - QR Prezıdenti
ASTANA. QazAqparat - Jyl saıyn Qazaqstandaǵy halyq bir qalaǵa kóbeıip otyratyn bolsa, bul - bir úlken ǵanıbet.
Bul týraly búgin Qazaqstan Prezıdenti Nursultan Nazarbaev birqatar qazaqstandyq BAQ ókilderimen suhbaty barysynda málim etti.
Halyqtyń demografııalyq ahýalyna toqtalǵan Memleket basshysy sońǵy ýaqyttarda halyq sany artyp otyrǵandyǵyn tilge tıek etti.
«Oılap qaraıtyn bolsaq, 1991 jyldan 1995 jylǵa deıin Qazaqstannan 3,5 mln. halyq ketip qaldy. Ol kezde bizdiń halqymyzdyń sany 14 mln. adamǵa deıin tústi. Sebebi tolqymaly jaǵdaı boldy, halyq jaǵdaıymyz qalaı bolady dep, kebireýleri Reseıge kóshti, nemister Germanııaǵa kóshti, Gretsııaǵa, Izraılge qonys aýdaryp ketti. Eshqaısysyn da ustaǵanymyz joq. Halyq 14 mıllıonnan túsip ketti. Qazir jaǵdaı jasaǵanymyzdyń arqasynda qaıtadan ornyna kelip, 17 mln-nan asty. Onyń ishinde 1 mıllıonnan astamy qandastarymyzdy syrttan alyp keldik. Olar balaly bolyp, kóbeıip jatyr. Sonan keıin Qazaqstannyń ishindegi jaǵdaıdy túzep, balalarǵa qam jasadyq. Bul, árıne, qýanyshty jaǵdaılar», - dedi ol.
Onyń atap kórsetkenindeı, bir jyldyń ishinde 265 myń bala mektep tabaldyryǵyn attap, birinshi synypqa bardy. «Ol bir Oral sııaqty bir qalanyń turǵyndarymen para-par. Jyl saıyn Qazaqstandaǵy halyq bir qalaǵa kóbeıip otyratyn bolsa, bul bir úlken ǵanıbet. Qazaqstan tarıhynda alǵash ret 700 mektep salyndy. Densaýlyq saqtaý mekemeleri 600-den astamy salyndy. Álde de 3 aýysymda oqytatyn mektepter bar, eskirgen mektepter bar. Sondyqtan qazaqta sóz bar ǵoı, «bir qozy týsa, bir túp jýsan artyq ósedi» degen. Ár balanyń óz nesibesi bar», - dedi N.Nazarbaev.
