Qazaqstan halqynyń sany 19,18 mln adamǵa jetti

NUR-SULTAN. QazAqparat – Qazaqstan halqynyń sany bir jylda 1,3%-ǵa ósip, 2022 jyldyń basynda 19,12 mln adam boldy. Onyń 9,84 mıllıony – áıelder, 9,29 mıllıony – erler, dep habarlaıdy QazAqparat ranking.kz saıtyna silteme jasap.

Halyqtyń jalpy sanyndaǵy áıelderdiń úlesi jyl basynda 51,44%-dy qurady. Bir jyl buryn bul kórsetkish 51,48%, bes jyl buryn – 51,62%, on jyl buryn – 51,77% bolǵan edi.

Bıyl birinshi toqsan qorytyndysy boıynsha halyq sany 19,18 mıllıon adamǵa jetti. Onyń ishinde 9,31 mıllıony – erler, 9,86 mıllıony – áıelder. Áıelderdiń úlesi taǵy da 51,43%-ǵa deıin azaıdy.

Jalpy áıelderdiń úlesi erlerge qaraǵanda birshama joǵary bolǵanymen, jyldan jylǵa azaıyp keledi jáne bul úrdis turaqty. Sońǵy 5 jylda áıelder sanynyń ortasha jyldyq ósimi 1,2% bolsa, erler sanynyń ósimi 1,4%-qurap otyr.

Alaıda, áıelderdiń erlerdiń basymdyǵyna qaramastan, jalpy kórsetkishte jas boıynsha bólinýi múldem basqasha kórinedi.

Osylaısha QR-daǵy 14 pen 28 jas aralyǵyndaǵy jas áıelder sany bir jylda 0,1%-ǵa azaıyp, bıyl jyl basynda 1,83 mln adamǵa jetti. Bul rette jas jigitterdiń sany, kerisinshe, 0,1%-ǵa ósip, 1,92 mln adam boldy. Bul dınamıka da turaqty.

Nátıjesinde 2022 jyldyń basynda jastardyń jalpy sanyndaǵy jas áıelderdiń úlesi nebári 48,87% boldy, ıaǵnı jartysynan da az. Qyzdardyń úlesi jyldan-jylǵa azaıyp keledi. Bir jyl buryn bul kórsetkish 48,92%-ǵa, bes jyl buryn 49,5%-ǵa, odan on jyl buryn 49,88%-ǵa jetken (ıaǵnı, jigittermen birdeı).

Osylaısha «statıstıka málimetteri boıynsha 10 qyzǵa 9 jigitten keledi» degen eskirgen keńestik stereotıptiń Qazaqstanǵa múldem qatysy joq (bolǵan da emes).

Statıstıka málimetterine sáıkes, Qazaqstanda uldarǵa qaraǵanda qyzdar aıtarlyqtaı az: 2021 jyly 216,2 myń qyz dúnıege kelse, uldardardyń sany 230,3 myń bolǵan. Qyzdardyń úlesi – 48,4 %. Al eń «neke» jasyndaǵy (28 jasqa deıin) jastardyń arasynda 1000 jigitke 956 qyzdan keledi. Alshaqtyq jyldan-jylǵa artyp, qyzdardyń sany azaıyp barady.