Qazaqstan halqynyń sany 17 mln. 671 myń adamǵa jetti
ASTANA. QazAqparat - 2016 jylǵy 1 qańtarda elimizdegi halyq sany 17 mln. 671,0 myń adamdy qurady. Sonyń ishinde qalalyqtar - 10 mln. 066,7 myń (57 paıyz), aýyldyqtar - 7 mln. 604,3 myń adamdy (43 paıyz) bolyp otyr.
Osylaısha, 2015 jylǵy 1 qańtarmen salystyrǵanda halyq sany 253,6 myń adamǵa nemese 1,46 paıyzǵa ósti. Bul týraly Ulttyq ekonomıka mınıstrligi Statıstıka komıtetiniń baspasóz qyzmetinen habarlandy.
Azamattyq hal aktileri jazbalaryndaǵy málimetterdi óńdeý nátıjesinde, 2015 jyldyń qańtar-jeltoqsanda týylǵandar sany 398,6 myń adamdy qurady, bul 2014j. qańtar-jeltoqsanǵa qaraǵanda 0,6 paıyzǵa az. Týýdyń jalpy koeffıtsıenti 1000 adamǵa 22,72 týylǵandardy quraǵan.
Qarastyrylyp otyrǵan kezeńde qaıtys bolǵandar sany 131,9 myń adamdy qurady, bul 2014j. qańtar-jeltoqsanǵa qaraǵanda 0,2% az. Ólim-jitimniń jalpy koeffıtsıenti 1 000 adamǵa 7,52 (7,65) qaıtys bolǵandardy qurady.
Jalpy byltyrǵy jyly respýblıka halqynyń tabıǵı ósimi 2014 jylmen salystyrǵanda 2,1 myń adamǵa nemese 0,8 paıyzǵa azaıyp, 266,7 myń adamdy qurady. Tabıǵı ósimniń jalpy koeffıtsıenti 1000 adamǵa shaqqanda 15,20 adamdy qurady.
2015 jylǵy qańtar-jeltoqsanda respýblıkada 1 jasqa deıingi 3 742 náreste ólimi tirkeldi. Osylaısha 1 jasqa deıingi shetinegen náreste sany 5,1 paıyzǵa azaıdy. Náreste ólim-jitiminiń negizgi sebebi - perınataldyq kezeńde paıda bolatyn jaǵdaılar.
«Kóshi-qon polıtsııasy organdary usynǵan málimetterge qaraǵanda, 2015 jyly elimizge turǵylyqty turýǵa kelgenderdiń tirkelý sany 2014 jylmen salystyrǵanda 0,7 paıyzǵa kemip, 16 670 adamdy quraǵan. Elimizden ketken kóship-qonýshylardyń tirkelý sany 3,9 paıyzǵa kóbeıip, 30080 adam boldy. Elimizdegi negizgi kóshi-qon almasýy TMD memleketterimen oryn alǵan. Al óńiraralyq kóship-qonýshylardyń úlesine elimizdiń jalpy ishki kóship-qonýshylar sanynyń 42,9 paıyzy tıesili. Óńiraralyq kóshi-qonnyń oń aıyrymy Almaty (41 927 adam) qalasynda jáne Aqmola (3633 adam), Qostanaı (1 075 adam), Mańǵystaý (575 adam), Pavlodar (336 adam), Batys-Qazaqstan (184 adam) oblystarynda qalyptasty», - delingen baspasóz baıanynda.
