Qazaqstan halqynyń sany 17 mln. 630,7 myń adamdy qurady
ASTANA. QazAqparat - 2015 jylǵy 1 qarashadaǵy jaǵdaı boıynsha elimizdegi halyq sany 17 mln. 630,7 myń adamdy qurady. Sonyń ishinde qalalyqtar - 10 mln. 036,2 myń (56,9 paıyz), aýyldyqtar - 7 mln. 594,5 myń adamdy (43,1 paıyz) bolyp otyr.
Bul týraly QR Ulttyq ekonomıka mınıstrliginiń Statıstıka komıtetinen habarlandy.
Málimetterge qaraǵanda, 2015 jylǵy qańtar-qazanda halyq sany jalpy el boıynsha 213 myń adamǵa nemese 1,2 paıyzǵa ósken. Bul kórsetkish boıynsha 2014 jylǵy 1 qarashamen salystyrǵanda halyq sany 253 myń adamǵa nemese 1,46 paıyzǵa artyp otyr. Al AHAT organdary usynǵan azamattyq hal aktileri jazbalaryndaǵy málimetterdi óńdeý nátıjesinde, 2015 jyly qańtar-qazanda týylǵandar sany 336,4 myń adamdy quraǵan. Týý kezektiligi boıynsha birinshi, ekinshi jáne úshinshi týǵandardyń úles salmaǵy sáıkesinshe 34 paıyz, 28 paıyz jáne 18 paıyzdy qurap otyr. Týýdyń jalpy koeffıtsıenti 1000 adamǵa 23,02 týylǵandardan keledi.
«2015 jyldyń qańtar-qazanynda respýblıka halqynyń tabıǵı ósimi byltyrǵy jyldyń osy kezeńimen salystyrǵanda 2,6 myń adamǵa nemese 1,1 paıyzǵa azaıyp, 225 myń adamdy qurady. Tabıǵı ósimniń jalpy koeffıtsıenti 1000 adamǵa shaqqanda 15,39 adamdy qurady», delingen baspasóz baıanynda.
Budan bólek, Kóshi-qon polıtsııasy organdary usynǵan kelý/ketýdi statıstıkalyq esepke alý talondaryndaǵy málimetterdi óńdeý nátıjesinde, 2015 jylǵy qańtar-qazanda elimizge turǵylyqty turýǵa kelgenderdiń tirkelý sany (kóship-qonýshylar) 2014 jylǵy qańtar-qazanmen salystyrǵanda 1,5 paıyzǵa kemip, 13 myń 557 adam bolǵan. Osy kezeńde elimizden ketken kóship-qonýshylardyń tirkelý sany 4,5 paıyzǵa kóbeıip, 25 myń 432 adamdy qurady, al kóshi-qonnyń aıyrymy -11 myń 875 adam boldy. Bul rette elimizdegi negizgi kóshi-qon almasýy TMD memleketterimen bolyp otyrǵanyn atap ótý kerek.
