Qazaqstan halqynyń sany 17 mln. 608 myń adamnan asty
ASTANA. QazAqparat - 2015 jyldyń 1 qazanyndaǵy málimetter boıynsha elimizdegi halyq sany 17 mln. 608,2 myń adamdy qurady. Sonyń ishinde qalalyqtar - 10 mln 18,4 myń (56,9%), aýyldyqtar - 7 589,8 myń adamdy (43,1%) qurap otyr. Bul týraly QR Ulttyq ekonomıka mınıstrligi Statıstıka komıtetiniń baspasóz qyzmetinen habarlandy.
Komıtet taratqan málimetterge qaraǵanda, 2015 jylǵy qańtar-qyrkúıekte halyq sany jalpy el boıynsha 190,5 myń adamǵa nemese 1,1 paıyzǵa, al 2014 jylǵy 1 qazanmen salystyrǵanda halyq sany 254,5 myń adamǵa nemese 1,47 paıyzǵa ósti.
«AHAT organdary usynǵan azamattyq hal aktileri jazbalaryndaǵy málimetterdi óńdeý nátıjesinde, 2015 jyldyń qańtar-qyrkúıeginde týylǵandar sany 301,8 (301,3) myń adamdy qurap, bul kórsetkish byltyrǵy osy kezeńmen salystyrǵanda 0,2 paıyzǵa artqan. Týý kezektiligi boıynsha birinshi, ekinshi jáne úshinshi týǵandardyń úles salmaǵy sáıkesinshe 35 paıyz (byltyr 38 paıyz), 28 paıyz (27 paıyz) jáne 18 paıyzdy (16 paıyz) qurady. Týýdyń jalpy koeffıtsıenti 1000 adamǵa 23,00 (23,30) týylǵandardan keledi», - delingen baspasóz baıanynda.
Sonymen qatar, esepti kezeńde qaıtys bolǵandar sany 101,0 (99,3) myń adamdy quraǵan, bul 2014 jyldyń qańtar-qyrkúıegine qaraǵanda 1,7% kóp. Ólim-jitimniń jalpy koeffıtsıenti 1000 adamǵa 7,69 (7,68) qaıtys bolǵandardy qurap otyr.
«2015 jyldyń qańtar-qyrkúıeginde respýblıka halqynyń tabıǵı ósimi byltyrǵy qańtar-qyrkúıekpen salystyrǵanda 1,2 myń adamǵa nemese 0,6 paıyzǵa azaıyp, 200,9 (202,0) myń adamdy qurady. Tabıǵı ósimniń jalpy koeffıtsıenti 1000 adamǵa shaqqanda 15,31 (15,62) adam bolyp otyr. Esepti kezeńde respýblıkada 1 jasqa deıingi qaıtys bolǵan náreste sany 2 864 (2 999) adamdy qurap, byltyrmen salystyrǵanda 4,5% azaıdy. Náreste ólim-jitiminiń negizgi sebebi - perınataldyq kezeńde paıda bolatyn jaǵdaılar», - delingen baspasóz baıanynda.
Budan bólek, Kóshi-qon polıtsııasy organdary usynǵan Qazaqstanǵa kelý/ketýdi statıstıkalyq esepke alý talondaryndaǵy málimetterdi óńdeý nátıjesinde, 2015 jylǵy qańtar-qyrkúıeginde elimizge turǵylyqty turýǵa kelgenderdiń tirkelý sany (kóship-qonýshylar) 12 161 adamdy quraǵan. Elimizden ketken kóship-qonýshylardyń tirkelý sany 5,6 paıyzǵa kóbeıip, 22 480 adamdy quraǵan, al kóshi-qonnyń aıyrymy -10 319 adam boldy.
«Elimizdegi negizgi kóshi-qon almasýy TMD memleketterimen bolýda. TMD elderinen kelgenderdiń jáne sol elderge ketkenderdiń úlesi, tıisinshe, 86,2 paıyz jáne 90,2 paıyzdy qurady. Byltyrǵy kezeńimen salystyrǵanda el ishinde kóship-qonýshylar sany 17,1% kóbeıip, 348 732 adamdy qurady. Óńiraralyq kóship-qonýshylardyń úlesine elimizdiń jalpy ishki kóship-qonýshylar sanynyń 44,5 paıyzy tıesili. Óńiraralyq kóshi-qonnyń oń aıyrymy Almaty (31 525 adam) qalasynda jáne Aqmola (2 693 adam), Qostanaı (851 adam), Mańǵystaý (687 adam), Atyraý (316 adam), Pavlodar (44 adam) oblystarynda qalyptasty», - delingen baspasóz baıanynda.
