Qazaqstan halqynyń sany 17 mln. 28 myńǵa jetti
ASTANA. 14 tamyz. QazAqparat - Bıylǵy shildeniń basynda Qazaqstanda halyq sany 17 mln. 28 myń adamǵa jetti. Bul týraly búgin Astanada ótken baspasóz máslıhatynda QR Statıstıka agenttiginiń tóraǵasy Álıhan Smaıylov málim etti.
«Elimizdegi halyq sany 2013 jylǵy 1 shildedegi jaǵdaı boıynsha 17 mln. 28 myń adamdy qurady. Onyń ishinde qalalyqtar - 9 mln. 350,8 myń (54.9 paıyz), al aýyldaǵy halyq sany 7 mln. 677,8 myń (45,1 paıyz) adamǵa jetti. Bıylǵy qańtar-shildede halyq sany jalpy 118,8 myń adamǵa nemese 0,7 paıyzǵa artty. 2012 jyldyń sáıkes kezeńimen salystyrǵanda halyq sany 234,7 myń adamǵa nemese 1,4 paıyzǵa ósti», - dedi agenttik basshysy.
Onyń aıtýynsha, qańtar-shilde aralyǵynda 188 myńnan astam bala ómirge keldi. Bul óz kezeginde byltyrdyń osy kezeńine qaraǵanda 0,6 paıyzǵa joǵary.
Budan bólek jarty jylda elimizde 70,4 myń adam qaıtys bolǵan.
