Qazaqstan halqynyń sany 16 mln. 896 myń adamdy qurady - Statıstıka agenttiginiń tóraǵasy
ASTANA. 28 qańtar. QazAqparat - 2012 jyldyń 1 jeltoqsanyndaǵy jaǵdaı boıynsha Qazaqstan halqy sany 16 mln. 896 myń adamdy qurady.
Búgin Parlament Májilisindegi Úkimet saǵatynda QR Statıstıka agenttiginiń tóraǵasy Álıhan Smaılov osylaı málim etti.
Agenttik tóraǵasynyń aıtýynsha, bul jyl basynan halyq sany 1,4 paıyzǵa ósken.
«Demografııalyq statıstıka halyqtyń tabıǵı ósimi men mıgratsııalyq úderis negizinen quralyp otyr. Al osy statıstıkany jetildirý úshin biz birqatar sharalardy atqaryp jatyrmyz. Bul rette «e-statıstıka» sheńberinde halyqtyń statıstıkalyq tirkelimi júıesin quryp jatyrmyz. Osy statıstıkalyq tirkelim boıynsha Ádilet mınıstrligi, Densaýlyq saqtaý, Eńbek jáne halyqty áleýmettik qorǵaý, Bilim jáne ǵylym mınıstrliginen, Іshki ister mınıstrliginen jáne Ulttyq qaýipsizdik komıtetterinen aqparattardy alatyn bolamyz», - dedi Á.Smaıylov.
