Qazaqstan halqynyń ónerine qatysty 10 kitap jaryqqa shyqty
«Qazaqstan halqy ádebıeti jáne ulttyq sáıkestik» atty konferentsııada tanystyrylǵan kitaptardy ǵalym, jazýshy Ýálıhan Qalıjanov basshylyǵymen M.Áýezov atyndaǵy ádebıet jáne mádenıet ınstıtýty qurastyryp shyǵardy.
Olardyń qatarynda «Qazirgi ádebıettegi jalpy adamı qundylyqtar», «Qazaqstandaǵy qazirgi zaman folklory», «Zamanaýı kezeńdegi Qazaqstan halqy ádebıeti», «Qazaqstan halqynyń mýzykalyq óneri», «Qazaqstan halqy ádebıeti», «Qazaqstan halqynyń sahna óneri», «Mádenı polılog: Qazaqstan halqynyń beıneleý óneri» syndy birinshi ujymdyq monografııalar qatysýshylar nazaryna usynyldy.
Rásimde sóz alǵan QR Premer-Mınıstriniń orynbasary Berdibek Saparbaev atalmysh shara Qazaqstan halqy Assambleıasynyń jyly aıasynda ótkizilip jatqanyn erekshe atap ótti.
«Ózderińiz bilesizder, osydan 20 jyl buryn, Memleket basshysy Nursultan Nazarbaevtyń bastamasymen qurylǵan Qazaqstan halqy Assambleıasynyń qazirgi tańda bizdiń ult, bizdiń eldiń ishinde ǵana emes, búkil dúnıejúzi úshin úlken orny bar. Árbir halyqtyń turmysy, hal-ahýaly, onyń ekonomıkasyna baılanysty bolady. Al ekonomıkanyń damýy úshin sol memlekette turaqtylyq, kelisim, tatý-tátti ómir qalyptasqan bolýy kerek. Elbasy Nursultan Nazarbaev ótkizip otyrǵan saıasatynyń arqasynda osy 20 jyldan beri kópultty Qazaqstanda eshqandaı qantógis, soǵys bolǵan joq», - deıdi vıtse-premer.
Onyń pikirinshe, Qazaqstanda turyp jatqan barlyq halyqtardyń ókilderi ózderiniń tarıhtaryn, dástúrlerin, ádebıetterin, mádenıetterin umytpaý úshin jaǵdaı jasalynýy kerek.
«Ádebıet tek qana bir ulttyń ádebıeti bolyp qalmaýy kerek, sol memlekette turyp jatqan barlyq halyqtardyń ádebıeti bolýy kerek. Ózderińiz jaqsy bilesizder, Memleket basshysy bizdiń memleketimizde turyp jatqan ulttardyń ádebıetiniń, mádenıetiniń, óneriniń, bilimderiniń damýyna úlken jaǵdaılar jasaýda. Árbir oblystarda ulttyq mádenı ortalyqtardyń, dostyq úıleriniń bar ekendigin bilesizder. Álemde Qazaqstan sııaqty 5 tilde óner kórsetetin teatrlary, 15 tilde shyǵatyn gazetteri bar elder kóp emes shyǵar», - dep túıindedi sózin B.Saparbaev.
