Qazaqstan halqynyń birligi kúnine oraı elordada birqatar merekelik sharalar ótip jatyr
ASTANA. QazAqparat - Qazirgi ýaqytta elordadaǵy «Dýman» qonaq úıiniń janyndaǵy parkıng aýmaǵynda «Astana EKSPO-2017» halyqaralyq mamandandyrylǵan kórmesiniń qamqorlyǵymen strıtboldan (kóshe basketboly) jarys ótýde.
Bul týraly astana.kz saıtyna is-sharany uıymdastyrýshylar habarlady.
Sonymen qatar, «Dýman» oıyn-saýyq kesheniniń janyndaǵy sport alańynda grafıt qabyrǵaǵa sýret salýdan jáne «breakdance» bıinen jarys bastaldy.
Sharaǵa elordanyń shyǵarmashylyq jáne bı ujymdary, JOO ókilderi, jastar uıymdary men tanymal dı-djeıler - DJ Plexus, DJ Felix, DJ Max Pride, DJ Pavel Colt qatysýda.
Eske salaıyq, búgin Qazaqstan halqynyń birligi kúnine oraı elorda turǵyndary men qonaqtary úshin birqatar merekelik sharalar uıymdastyrylýda. Atap aıtqanda, otandyq estrada juldyzdarynyń jáne elordalyq shyǵarmashylyq ujymdardyń qatysýymen festıvaldar, kontsertter, sporttyq saıystar, túrli kórmeler men jármeńkeler ótip jatyr. Bul merekelik is-sharalar elorda turǵyndary men qonaqtaryna merekelik kóńil-kúı syılamaq.
