Qazaqstan halqynyń birligi kúninde elordada aýqymdy sharalar uıymdastyrylady
ASTANA. QazAqparat - 1 mamyr - Qazaqstan halqynyń birligi kúninde elordada 40-tan astam túrli sharalar ótkiziledi. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda Astana qalasy Іshki saıasat basqarmasynyń basshysy Bolat Tilepov málim etti.
«1 mamyr - Qazaqstan halqynyń birligi kúninde elordadaǵy merekelik sharalarǵa erekshe nazar aýdarylyp otyr. Osy aıtýly merekege baılanysty qalamyzda 40-tan astam túrli sharalar ótkiziledi. Al endi mazmundyq jaǵyna keletin bolsaq, bul sharalar birneshe baǵytqa bólinedi. Eń aldymen rýhanı-ıdeologııalyq turǵyda 1 mamyrǵa deıin qalamyzdaǵy uıymdar men kásiporyndarda, oqý oryndarynda birlik pen yntymaqtyń qundylyqtaryn nasıhattaıtyn sharalar ótkizilýde»,-dedi ol.
Óz kezeginde, Astana qalasy Mádenıet basqarmasynyń basshysy Bolat Majaǵulov mereke kúni qaladaǵy «Qazaq eli» monýmenti aldyndaǵy alańdaǵy úsh sahnada aýqymdy kontserttik baǵdarlama uıymdastyrylatynyn atap ótti. Osy kúni bas sahnada óner ujymdarynyń 700-den astam ártisi ónerlerin pash etpek.
Budan bólek, saǵat 10-nan 17-ge deıin shaǵyn sahnalarda qalanyń etnomádenı birlestikteri ózderiniń kontsertin kópshilik nazaryna usynbaq.
«Astananyń bas alańyndaǵy merekelik sharalarǵa 100 myńnan astam adam keledi dep kútilýde», - dedi basqarma basshysy.
