Qazaqstan halqynyń birligi kúninde Astanada 70-ke jýyq is-shara ótedi
Elorda turǵyndary men qonaqtary úshin barlyq tórt aýdanda, ashyq alańdarda merekelik kontsertter, sport jarystary, ınteraktıvter uıymdastyrylady.
Atap aıtqanda, 26 sáýir kúni saǵat 11:00-de Baıqońyr aýdanynyń belsendi uzaq ómir súrý ortalyǵynda «Qazaqstan – bizdiń ortaq úıimiz» atty merekelik aqparattyq-taqyryptyq kezdesý uıymdastyrylady. Al bir saǵattan keıin Saryarqa aýdanyndaǵy osyndaı ortalyqta «1 mamyr – kóktem men eńbek merekesi» atty kontserttik baǵdarlama bastalady.
27 sáýirde Muǵalimder alleıasynda «Ónerli qol — baqytqa jol» jobasy aıasynda kitap kórmesi uıymdastyrylady. Sol kúni saǵat 11:00-de «Nurly júrek» áleýmettik qyzmet kórsetý ortalyǵy «1 mamyr – Qazaqstan halqynyń birligi kúni» kontserttik baǵdarlamasyn, al «Qamqor» ortalyǵy - «Bir shańyraq astynda» fleshmobyn ótkizedi.
28 sáýirde elordalyq Dostyq úıinde «Memlekettik til – qazaq tili elimizde turyp jatqan barlyq qazaqstandyqty biriktiretin kúsh» taqyrybynda dóńgelek ústel otyrysy ótedi. Oǵan qalanyń etnomádenı birlestikteriniń ókilderi qatysady.
Elordanyń joǵary oqý oryndarynda bul kúni arnaıy taqyryptaǵy tárbıelik saǵattar, kvızder uıymdastyrylady.
«Sharapat» áleýmettik qyzmet kórsetý ortalyǵynda saǵat 11:00-de «Yntymaq, birlik, kelisim - eń basty baılyq el úshin» kontserttik baǵdarlamasy, «Úmit» daǵdarys ortalyǵynda - «Kóńildi starttar» jarysy, «Jansaıa» ortalyǵyndabalalarǵa arnalǵan kontserttik baǵdarlama usynylady.
Sonymen qatar 28 sáýirde Esil University-de Qazaqstan etnostarynyń salt-dástúrlerine arnalǵan konkýrs, E. Serkebaev atyndaǵy №3 balalar mýzykalyq mektebinde «Meniń elim - Qazaqstan» kontserti uıymdastyrylady.
Sáken Seıfýllın murajaıy 28 sáýir men 3 mamyr aralyǵynda «Baqyt jolynda» kórmesine shaqyrady.
29 sáýirde Saryarqa aýdanynyń 25 jyldyǵyna jáne Qazaqstan halqynyń birligi kúnine oraı elorda turǵyndary arasynda spartakıada ótedi. Jazýshylar alleıasynda etnomádenı birlestikterdiń, mádenıet jáne bilim berý obektileriniń qatysýymen merekelik baǵdarlama usynylady.
Túrli is-sharalar 1 mamyrǵa josparlanǵan. Saǵat 11:00-de Jazýshylar alleıasynda ulttyq sport túrleri boıynsha jarystar ótedi. Al Trıatlon saıabaǵynda etnomádenı birlestikter men elshilikterdiń ókilderi saltanatty túrde aǵash otyrǵyzady. Munda kórme-jármeńke uıymdastyrylady.
1 mamyr kúni «Báıterek» monýmenti men qalalyq alańda saǵat 12:00-de merekelik is-sharalar bastalady. Qonaqtarǵa arnap qala uıymdarynyń shyǵarmashylyq ujymdary, memlekettik akademııalyq fılarmonııa ártisteri jáne otandyq estrada juldyzdary ónerden shashý shashady. Іs-sharalar qalanyń aýla klýbtarynda, saıabaqtarda ótkiziledi. Bul kúni elordada sýburqaqtar iske qosylady.
Sporttyq-buqaralyq is-sharalardy EXPO halyqaralyq kórme ortalyǵy, «Atatúrik», «Kóktal» saıabaqtary, «Qazaq eli» monýmenti mańynda ótkizý josparlanǵan. Qala turǵyndary ulttyq sport túrleri boıynsha, onyń ishinde asyq atý, armrestlıng, arqan tartý jáne gir kóterýden jarystarǵa qatysa alady.
Trıatlon saıabaǵynda sportsúıer qaýymdy merekelik marafon kútip tur.
Bul kúnderi aýdan ákimdikterinde kópbalaly analarǵa «Altyn alqa» jáne «Kúmis alqa» tósbelgileri tabystalady.
