Qazaqstan halqynyń birligi kúni Pavlodarda báıge maýsymy ashyldy
ASTANA. QazAqparat - Pavlodardaǵy «Qulager» ıppodromynda ótken báıgege bes myńnan astam kórermen jınaldy, dep habarlaıdy pavlodarnews.kz.
«Biz quqyqtary teń, dostyǵy jarasqan tatý otbasy tárizdimiz. Elimizdegi beıbitshilik pen kelisim - memleketimizde turyp jatqan halyqtyń mádenıeti men danalyǵynyń jemisi. Óńirde qoǵamdyq kelisim men jalpy ulttyq birlikti nyǵaıtý, til men mádenıetti, salt-dástúrdi nyǵaıtý boıynsha júıeli jumys júrgiziledi. Qoǵamdyq kelisim - táýelsiz Qazaqstannyń basty jetistigi»,- dedi óńir basshysy Bolat Baqaýov merekege oraı quttyqtaýynda.
Merekege oraı «Qulager» ıppodromynda báıge maýsymy ashyldy. Sáıgúlikke mingen oblys ákimi de ıppodromda júrip ótti. Báıgege Pavlodar oblysy men Astana, Kókshetaý, Petropavl, Qaraǵandy, Shyǵys Qazaqstan óńirlerinen shamamen 60 adam qatysty.
Dástúr boıynsha úsh qashyqtyq boıynsha báıge uıymdastyryldy. Jeńimpazdarǵa teledıdar men temir tulparlardyń kiltteri tabys etildi.
