Qazaqstan halqynyń berik dostyǵy ejelden qalyptasqan jáne sonyń arqasynda respýblıka aıtarlyqtaı jetistikterge jetip otyr - Frıdrıh Kım
ALMATY. Mamyrdyń 1-i. QazAqparat / Ádilet Musahaev / - Búgin Almatydaǵy Astana alańynda Qazaqstan halyqynyń birligi kúni memlekettik meıramy atap ótilýde,
dep habarlaıdy QazAqparat.
Elbasy N.Á.Nazarbaevtyń Jarlyǵyna sáıkes 1996 jyldan bastap bul kún meıram retinde atap ótilýde. 130-dan astam ult ókilderi turatyn Qazaqstan úshin bul mereke dástúrli meıramdardyń birine aınaldy.
Merekelik shara aıasynda elimizde meken etetin ár ult ókilderi ózderiniń ulttyq án-bılerimen ónerlerin ortaǵa salýda.
Sondaı-aq arqan tartý, qol kúresi, kir tasyn kóterý, estafetalyq jarys sııaqty sporttyq sharalar uıymdastyryldy.
Koreı ulttyq mádenı ortalyǵy tóraǵasynyń orynbasary Frıdrıh Nıkolaevıch Kımniń aıtýynsha, Qazaqstan halqynyń berik dostyǵy ejelden qalyptasqan jáne sonyń arqasynda respýblıka aıtarlyqtaı jetistikterge jetip otyr.
«Koreı dıasporasy 1937 jyldan beri Qazaqstanda meken etip keledi. 70 jyldan asa osy jerge qonys aýdarǵan basqa da ulttarmen jáne qazaq halqymen týysqan-baýyr retinde aralasyp turyp jatyrmyz. Qazaqstanda turatyn 130-dan asa ult ókilderine zor densaýlyq, jaqsy ómir tileımin. Sonyń ishinde qazaq halqynyń qonaqjaılylyǵyn, qaıyrymdy, keń peıildiligin atap ótkim keledi. Sondyqtan qazaq halqynyń gúldenip, kórkeıýin tileımin, al biz Qazaqstannyń damyp órkendeýine óz úlesimizdi qosa beremiz», deıdi F. Kım.
