Qazaqstan halqynyń 94 paıyzy Elbasynyń Prezıdenttik ókilettigin uzartý jónindegi referendýmnan habardar - saýalnama

ASTANA. 26 qańtar. QazAqparat /Marlan Jıembaı/ - Qazaqstan halqynyń 94 paıyzy Elbasynyń Prezıdenttik ókilettigin uzartý jónindegi referendýmnan habardar. Bul týraly búgin elordada ótken baspasóz máslıhaty barysynda «InfoSystem» zertteý ortalyǵy» qoǵamdyq qorynyń basshysy Janar Boqanova málim etti.

Qor basshysynyń aıtýyna qaraǵanda, barlyq suraqtar úsh topqa bólingen. Birinshi topta eldegi áleýmettik-saıası ahýal, ekinshi topta jalpy bılik pen memlekettik organdardyń qyzmetine, al sońǵy topta Prezıdenttiń ókilettigin uzartý jónindegi referendýmǵa halyqtyń kózqarasy baǵalanǵan.

«Eldegi áleýmettik ahýaldy jáne óziniń turmys jaǵdaıyn oń dep sanaıtyndardyń sany basym ekendigin aıtýǵa bolady. Naqtylaıtyn bolsaq, respondentterdiń 87 paıyzy eldegi ahýaldy qolaıly jáne tynysh dep baǵalaıdy. Áleýmettik qanaǵattanýshylyqtyń da deńgeıi joǵary, ol 78 paıyzdy quraıdy. Sonymen qatar ekonomıkalyq ahýaldy da zertteýge qatysqan respondentterdiń 82 paıyzy oń baǵalady», - dedi ol.

Onyń aıtýynsha, ekinshi top boıynsha saýalnamaǵa qatysqan azamattardyń 92 paıyzy Memleket basshysynyń qyzmetin óte joǵary baǵalaǵan. Úkimet pen Parlament qyzmeti de oń saralanǵan, degenmen halyqtyń qanaǵattanýshylyq deńgeıi sál tómen bolyp otyr. Sondaı-aq qazirgi ýaqytta qoǵamda Prezıdenttiń, ortalyq jáne jergilikti organdardyń, «Nur Otan» partııasynyń qyzmeti men bastamalaryn halyqtyń qoldaý kórsetý deńgeıi óte joǵary.

«Turǵyndardyń Prezıdenttiń ókilettigin uzartý jónindegi referendým týraly habardarlyǵy - 94 paıyz. Bul óte joǵary baǵa», - dedi J.Boqanova.

Aıta keteıik, 2010 jyldyń 25 jeltoqsany men 2011 jyldyń 17 qańtary aralyǵynda «InfoSystem» zertteý ortalyǵy Qazaqstan halqynyń áleýmettik-saıası ál-ahýalynyń serpinine sotsıologııalyq zertteýler ótkizgen bolatyn. Saýalnamaǵa elimizdiń 14 oblysy men respýblıkalyq mańyzy bar Almaty, Astana qalalarynan 18-54 jas aralyǵyndaǵy 1600 adam qatysty.