«Qazaqstan halqyna»: Omyrtqasynda aqaýy bar 4 balaǵa 3,7 mlrd teńgeniń dárisi satyp alyndy

NUR-SULTAN. QazAqparat – «Qazaqstan halqyna» qorynyń esebinen omyrtqa bulshyqetiniń atrofııasyna shaldyqqan 4 balaǵa Qazaqstan aýmaǵynda tirkelmegen ZOLGENSMA preparatyn satyp alý úshin jalpy somasy 4 mlrd teńge tólengen, dep habarlaıdy QazAqparat tilshisi.

Bul týraly qordyń resmı saıty jazdy. «Qazaqstan halqyna» qorynyń qamqorshylyq keńesiniń kezekti otyrysynda jumsalǵan aqshanyń esebi qaralǵan.

25 naýryzdaǵy jaǵdaı boıynsha qordan qańtar oqıǵasynda zardap shekkenderge jalpy somasy 495 mıllıon teńgege qaıyrymdylyq kómek kórsetilgen. Onyń ishinde:

- qaza tapqan áskerı qyzmetkerlerdiń, ishki ister jáne ulttyq qaýipsizdik organdary qyzmetkerleriniń otbasylaryna – 133 mln teńge;

- aýyr jaraqat alǵan áskerı qyzmetkerlerge, ishki ister jáne ulttyq qaýipsizdik organdarynyń qyzmetkerlerine – 318 mln teńge;

- qańtar oqıǵasynyń kezdeısoq qurbany bolǵan Qazaqstan Respýblıkasy azamattarynyń otbasylaryna – 35 mln teńge;

- qańtar oqıǵasy kezinde zardap shekken balalardyń otbasylaryna – 9 mln.

«Bul baǵyttaǵy jumystar áli de jalǵasýda, azamattardyń óliminiń mán-jaıyn quzyrly organdar anyqtap jatyr», -dep jazylǵan málimette.

Sondaı-aq, omyrtqa bulshyqetiniń atrofııasyna shaldyqqan 4 balaǵa Qazaqstan Respýblıkasynda tirkelmegen Onasemnogene Abeparvovec (ZOLGENSMA) preparatyn satyp alý úshin jalpy somasy 4 mlrd teńge tólengen.

«Naýqastar aýrýhanaǵa jatqyzyldy. Ár naýqasqa dárilik zatty jeke óndirý úshin bıomaterıaldar alyndy. Birinshi balaǵa preparat 26 naýryzda engizildi, qalǵandaryn 8 sáýirge deıin engizý josparlanýda», -dep jazylǵan qordyń saıtyndaǵy aqparatta.