«Qazaqstan halqyna» qorynyń jumysyna aralaspaımyn – Qasym-Jomart Toqaev

NUR-SULTAN. QazAqparat – Memleket basshysy Qasym-Jomart Toqaev «Habar» jáne «Habar 24» telearnalaryna bergen suhbatynda «Qazaqstan halqyna» qory týraly suraqtarǵa jaýap berdi, dep habarlaıdy QazAqparat.

«Qazaqstan halqyna» qorynda 20 mlrd teńgeden astam qarajat jınaldy. Biraq olıgarhtar qarajat berýge áli de asyqpaı jatqan sekildi. Qarajat turaqty túsip turýy úshin olarǵa qandaı shara qoldanasyzdar? Qordyń jumysy qalaı jolǵa qoıylýy kerek?», - dep suraq qoıdy telejúrgizýshi.

«Qazirgi ýaqytta qordaǵy qarajat 20 mlrd teńgeden asty, shamamen 50 mlrd teńgedeı tústi. Jeke ózim bul qordyń jumysyna aralaspaımyn. Onyń jetekshisi retinde burynǵy Qarjy mınıstri Bolat Jámishev taǵaıyndaldy. Qamqorshylyq keńes bar, onyń da qurylymyna qatyspaımyn. Olar qoǵamdyq negizderde jumys isteıdi. Meniń mindetim – osy qorǵa jarnalardyń túsýin yntalandyrý. Menińshe, bul dabyl anyq jetkizildi», - dedi Qasym-Jomart Toqaev.

Óz sózinde Prezıdent munyń salyq emes, qaıyrymdylyq ekenin, degenmen qandaı da bir parametrler ornatý qajettigin aıtty.

«Meniń bilýimshe, Úkimet salyq salynatyn tabysqa 3 protsentti belgiledi, bul óte iri, aıtarlyqtaı iri bıznesterge qatysty. «Qazaqstan halqyna» qory aýrý balalarǵa, balalar sportyn, ásirese aýyldyq jerdegi sportty damytýǵa, Almatyny qalpyna keltirýge, mádenıetti kóterýge jáne basqa da máselelerdi sheshýge kómektesedi. Ony qamqorshylyq keńes sheshedi. (...) Bárin kómekpen qamtý qorǵa qansha qarajat jınalǵanyna baılanysty bolady. Ári qaraı qamqorshylyq keńes sheshim qabyldaıdy», - dedi Memleket basshysy.

Aıta keteıik, «Qazaqstan halqyna» qoryna 16-27 qańtar aralyǵynda 52 mlrd teńgeden astam qarjy túsken.