«Qazaqstan halqyna» qorynyń qamqorshylyq keńesi múshelerine jalaqy tólene me

NUR-SULTAN. QazAqparat - «Qazaqstan halqyna» qorynyń qamqorshylyq keńesine múshe bolǵan azamattar qyzmeti úshin jalaqy ala ma? Bul suraqqa qordyń basqarma tóraǵasy Bolat Jámishev jaýap berdi, dep habarlaıdy QazAqparat tilshisi.

«Biz qor qyzmetin jandandyrýda óńirlerdegi qaıyrymdylyq jáne qoǵamdyq uıymdarmen birlesip jumys isteıtin bolamyz. Sebebi biz búkil respýblıkany qamtı almaımyz. Qoǵamdyq uıymdarmen seriktes retinde jumys isteımiz. Jáne olardyń qyzmetine aqy tólenbeıdi. Bul - qoǵamdyq jumys. Sonymen qatar bizben jumys isteıtin qoǵamdyq, ıaǵnı qaıyrymdylyq uıymdar bizdiń qordyń qarajatyn ıgerip, meńgermeıdi. Qaıyrymdylyq qarajaty muqtaj jannyń qaltasyna tikeleı aýdarylady», - dedi B. Jámishev ortalyq kommýnıkatsııalar qyzmetinde onlaın ótken baspasóz máslıhatynda.

Sondaı-aq, qor basshysy qamqorshylyq keńesi músheleriniń qyzmetine aqy tólene me degen saýalǵa jaýap berdi.

«Qamqorshylyq keńesi múshelerine qyzmeti úshin jalaqy tólenbeıdi. Olar qoǵamdyq jumys retinde atqarady. Keńes músheleri bekitilgennen keıin jıyn ótkizdik. Ol jerde qordyń jumys josparyn ortaǵa salyp, ár qatysýshy óz ıdeıasyn usyndy», - deıdi ol.

Atalǵan brıfıngte Bolat Jámishev qorǵa túsken qarajattyń ashyq jarııa etiletinin aıtyp sendirdi.

Odan bólek, tóraǵa qor esebinen eldiń áleýmettik máselesin túgeldeı sheshý múmkin emestigin jetkizdi.