Qazaqstan halqyna qorynan qańtar oqıǵasyna qatysty kimderge kómek kórsetiledi

NUR-SULTAN. QazAqparat – «Qazaqstan halqyna» qory qańtar oqıǵalary kezinde qaza tapqandar men jaralanǵandardyń otbasylaryna kómek kórsetedi. Bul týraly atalǵan qordyń tóraǵasy Bolat Jámishev málim etti, dep habarlaıdy QazAqparat tilshisi.

Onyń aıtýynsha, Qamqorlyq keńesi qaza bolǵan áskerılerdiń, ishki ister organdary, ulttyq qaýipsizdik organdary qyzmetkerleriniń otbasylaryna kómek kórsetý sheshimin qabyldady. Munymen qosa, qyzmetkerler arasynda aýyr jaraqat alǵandar da qamtylmaq. 3 qaza tapqan jáne 4 jaralanǵan balanyń otbasy, sondaı-aq qańtar oqıǵasy kezinde kezdeısoq qurban bolǵandardyń otbasylary eskerilmek.

«Azamattardyń tizimine toqtalsaq, biz ombýdsmenderden alǵan tizimdi nazarǵa aldyq. Osy oraıda Bala quqyqtary jónindegi ýákil Arýjan Saın men Adam quqyqtary jónindegi ýákil Elvıra Ázimovanyń joldaǵan aqparaty qaraldy. Árıne, bul adamdar azamattyq tulǵalardyń qaıtys bolýynyń barsha faktisin bilmeýi múmkin. Alaıda olarǵa joldanǵan úndeýlerge jáne keıbir isterdiń rezonanstylyǵyn eskere otyryp, olar (ombýdsmender) tıisti tizimdi jasady», - dedi B. Jámishev Ortalyq kommýnıkatsııalar qyzmetinde.

Osy oraıda ol qańtar oqıǵasynyń kezdeısoq qurbany bolǵandardyń týystaryna kómek kórsetý týraly sheshim qabyldanǵanyn jetkizdi.

«Bizge kelip túsken tizimge baılanysty bul adamdardyń qaza bolýynyń mán-jaıyn quzyrly organdarmen anyqtaý kerek bolady. Osy derekterdiń anyqtalýyna qaraı kómek kórsetetin bolamyz. Atap aıtqanda, qaıyrymdylyq qory retinde qańtar oqıǵasynyń kezdeısoq qurbandaryna kómek kórsetemiz degen belgi berip otyrmyz. Ózderińiz bilesizder, tergeý amaldary aıaqtalǵannan keıin, osy bastamalardy tolyq kólemde iske asyrý múmkin bolady», - dedi B. Jámishev.

Aıta keteıik, búgin «Qazaqstan Halqyna» qory qańtar oqıǵalary kezinde qaza tapqandar men jaralanǵandardyń otbasylaryna kómek kórsetýge qatysty málimet jarııalady.