«Qazaqstan halqyna» qoryna kelgen ótinimderdiń 70 paıyzy uıymnyń qyzmetine sáıkes kelmeıdi

NUR-SULTAN. QazAqparat – «Qazaqstan halqyna» qoǵamdyq qoryna kelip túsken ótinimderdiń 70 paıyzy uıymnyń qyzmetine sáıkes kelmeıdi. Bul týraly atalǵan qordyń tóraǵasy Bolat Jámishev málim etti, dep habarlaıdy QazAqparat tilshisi.

Osy oraıda ol Qor turǵyn úı satyp alýmen, azamattardyń nesıelerin óteýmen aınalyspaıtynyn atap ótti.

«Qaıyrymdylyq kómek týraly barlyq ótinim qordyń elektrondy portaly arqyly kelip túsedi. Búginde Qor qurylǵan sátten bastap Qazaqstannyń barlyq óńirinen 30 myńnan astam ótinim keldi. Onyń 70 paıyzy Qordyń qyzmetine sáıkes kelmeıdi. Olardyń kóbisi baspana satyp alý men nesıeni óteýge qatysty», - dedi B. Jámishev Ortalyq kommýnıkatsııalar qyzmetinde.

Onyń aıtýynsha, qalǵan ótinimder jarǵylyq mindetterge sáıkes keledi.

Budan buryn habarlanǵandaı, Bolat Jámishev shetelde emdelýge qarajat suraǵandardyń máselesi qalaı sheshiletinin aıtty.

Qor kúrdeli operatsııalardy júrgizý úshin Qazaqstanǵa sheteldik dárigerlerdi shaqyratyn bolady.