«Qazaqstan halqyna» qoryna azamattar kóbine densaýlyǵyna baılanysty júginedi

NUR-SULTAN. QazAqparat – Azamattardyń deni «Qazaqstan halqyna» qorynan kóbine densaýlyq jaǵdaıy boıynsha kómek suraıdy, dep habarlaıdy QazAqparat tilshisi.

«Qazaqstan halqyna» qory uıym jumysyn odan ári jetildire túsý maqsatynda úkimettik emes uıymdar ókilderiniń arasynda saýalnama ótkizdi. Onlaın saýalnama bıyl shilde-tamyz aıynda júrgizilip, oǵan 1 041 adam qatysty. 42 suraqtan turatyn saýalnamaǵa negizinen astanalyqtar men almatylyqtar jaýap berip, belsendilik tanytqan.

«Saýalnamanyń ishinde qaıyrymdylyq kórsetý salalary boıynsha suraqtar boldy. Onyń qatarynda densaýlyq saqtaý, bilim berý, áleýmettik qoldaý, mádenıet jáne sport salasy bar. Qatysýshylar 5 ball negizinde jaýap berdi. Nátıje kórsetkendeı, respondentterdiń deni qordan densaýlyq jaǵdaıy boıynsha kómek suraıtyny anyqtaldy. Atalǵan kórsetkish «Qazaqstan halqyna» qorynyń jumys saıasatyna sáıkes keledi. Sebebi, qor aldymen densaýlyq jaǵdaıy boıynsha kúttirmeıtin azamattarǵa kómek kórsetip keledi», - dedi «Qazaqstan halqyna» qory qamqorshylyq keńesiniń múshesi, «Help Today» qoǵamdyq qorynyń jetekshisi Elmıra Álıeva.

Onyń aıtýynsha, qordan suralatyn kómektiń kelesi salasy bilim berýge qatysty.

«Densaýlyq saqtaýdan keıin, bilim berý salasy qoldaýdy kerek etip otyr. Úshinshi kezekte azamattar áleýmettik qoldaý boıynsha qordan kómek surap jatyr», - deıdi ol.

Sondaı-aq, qor qamqorshylyq keńesi múshesiniń málimdeýinshe, respondentterdiń 32,3%-y qaıyrymdylyq saıasatyna qanaǵattanǵandyqtaryn atap ótken. «Qazaqstan halqyna» qorynyń saıasatyna qanaǵattanǵandardyń jıyntyq úlesi – 53,1%, al qanaǵattanbaǵandar – 15,2%.

Buǵan deıin «Qazaqstan halqyna» qory jańartylǵan jumys tujyrymdamasyn tanystyrǵany týraly habarlaǵan edik.

Sondaı-aq, qazaqstandyqtardyń 90%-y qaıyrymdylyq jasaý kerek dep esepteıdi.