«Qazaqstan halqyna» qory jabdyqtaǵan sport zaldarda 2 myńǵa tarta bala tegin jattyǵyp júr
Qordyń sport salasyndaǵy máselelerge nazar aýdarýyna eki myńnan astam jurtshylyq ókilderimen ótkizilgen onlaın-konferentsııalar men kóshpeli dóńgelek ústelder barysynda aıtylǵan usynystar negiz boldy. Usynymdar men ótinishter negizinde Qor tórt qaıyrymdylyq jobasyn iske asyryp keledi. Olar – aýyldardaǵy sport zaldardy jáne múmkindigi shekteýli balalarǵa arnalǵan dene shynyqtyrý-saýyqtyrý klýbtaryn jaraqtandyrý, para-hokkeıden Qazaqstannyń jalǵyz quramasyn sporttyq jabdyqtarmen qamtamasyz etý, para-atletterge protezder daıyndaý jobasy.
«Osyǵan deıin demeýshilerdiń qoldaýymen aýyldy jerlerde sport zaldardy ashyp júrgen «Batyr bolamyn!» qory bizge júgindi. «24 sport zaly» baǵdarlamasyn bastap, ótken jyly sport ınfraqurylymy álsiz nemese múlde joq shalǵaıdaǵy aýyldar men eldi mekenderde 23 zaldy jabdyqtadyq. Ǵımarat jergilikti bılik pen metsenattardyń esebinen berilip jóndelse, Qor jabdyqtarmen jáne sporttyq buıymdarmen qamtamasyz etti», - deıdi «Qazaqstan halqyna» qoǵamdyq qorynyń Basqarma tóraǵasy Bolat Jámishev.
Jabdyqtalǵan 23 zalda aýyldardaǵy turmysy tómen jáne kóp balaly otbasylardan shyqqan 5 jastan 18 jasqa deıingi 1 750 bala bokspen, kúrespen, dzıýdomen jáne basqa da sport túrlerimen únemi aınalysýǵa múmkindik aldy. Jergilikti jattyqtyrýshylar balalarǵa úıirme jumysyn ótkizedi. 24 zaldy ashýǵa Qor tarapynan 183,6 mln teńge bólingen.
Máselen, Atyraý oblysynyń 1,5 myńǵa jýyq adam turatyn Bódene aýylynda sport zalynyń ashylýy turǵyndar úshin kópten kútken oqıǵa boldy.
«Buryn bizdiń aýylda mundaı zal men kúresýge arnalǵan sporttyq qural-jabdyqtar bolmady. Osyndaı úıirmege barǵysy keletin balalar sany kóp. Sondyqtan, bul múmkindik úshin aǵalarymyzǵa rahmet», - dedi joldastarymen alǵashqylardyń biri bolyp kúres sektsııasyna jazylǵan oqýshy Myrzabek Qýanyshbek.
Jasóspirimder jarystarda nátıje kórsetip te jatyr. Máselen, ótken jylǵy jeltoqsanda Túrkistan oblysy Qaqpaq aýylynyń turǵyny Dosjan Marat J. Úshkempirovti eske alýǵa arnalǵan grek-rım kúresinen respýblıkalyq týrnırde qola júldege ıe boldy.
Sondaı-aq, erekshe qajettilikteri bar balalarǵa arnalǵan sport zaldaryn jaraqtandyrý jobasy da qolǵa alyndy. Balalardy beıimdelgish sportqa baýlyp júrgen «Jas jaýynger» dene shynyqtyrý-saýyqtyrý klýbynyń tabysty tájirıbesi qoldanyldy. Turaqty qatysýdyń nátıjesinde júrý qozǵalysy shektelgen ári jattyǵýǵa úırenbegen balalar shırap, alǵashqy qadamdaryn jasaı bastady. Sondyqtan, qor jobany «Tusaýkeser» dep atady. Joba aıasynda Astanada ashylǵan zalda jattyǵyp júrgen balalardyń biri – 10 jasar Ernur. Anasy Baqytgúl Qurmanbekovanyń sózinshe, olar úsh jyl buryn Qyzylordan elordaǵa kóship kelgen sátten bastap Ernur úıirmege qatysyp keledi. Osy ýaqyt ishinde qoly men aıaǵyndaǵy bulshyqetter nyǵaıyp, qımyly senimdi bola tústi.
«Memlekettik qamtamasyz etý aıasynda sal aýrýy bar balalarǵa jylyna bir ret ońaltýǵa kvota beriledi. Bul óte az, óıtkeni balalar kún saıyn jattyǵýy tıis. Qyzylordada turǵan kezimizde jylyna Astanaǵa eki ret baratynbyz. Birinshi ret kvota boıynsha tegin em alyp, keıin aqyly bólimge júginetinbiz. Em-dom keshendi júrgizilip, balam aıaǵyna turýy úshin Astanaǵa kóshýdi sheshtik. Sosyn osy úıirmege bara bastadyq. Senbeıtin shyǵarsyz, biraq oń qoly men aıaǵyn álsiz qozǵaltyp kelgen Ernur aqyryndap nátıje kórsete bastady. Bulshyqetteri men aıaq-qolyndaǵy kúshi arta tústi. Úıirmege balasyn ákeletin ata-ana kóp. Balasynyń júre bastap, óz-ózine qamqor bola alatynyna úmiti zor. Sondyqtan, mundaı dene shynyqtyrý-saýyqtyrý klýbtary búkil el boıynsha ashylý kerek», - deıdi Ernurdyń anasy Baqytgúl Qurmanbekova.
Qordyń seriktesi «Jas jaýynger» uıymy qajetti ǵımarat pen jattyqtyrýshylar tobyn anyqtaıdy. Qazirgi tańda «Qazaqstan halqyna» qorynyń jobasy Semeı, Atyraý, Shymkent, Almaty jáne Astanada ashylyp, oǵan 200-ge tarta erekshe bala barady. 37,4 mln teńgege zaldar qajetti jabdyqtarmen jabdyqtalǵan.
«Bul jerde damý erekshelikteri bar balalar jattyǵý jasaýdy, alǵashqy qadamdy jasaýdy úırenedi. Sonymen qatar, dos taýyp, ózderin chempıon sezinetin oryn. Turaqty qatysyp júrgennen keıin balalardyń emotsıonaldy jáne fızıkalyq damýyndaǵy oń ózgerister baıqalady», - dedi «Jas jaýynger» DSK jetekshisi Sadyq Baıymbetov.
«Qazaqstan halqyna» qory elimizdegi parasporttyń damýyna da úles qosyp otyr. Ótken jyldyń kúzinde Qorǵa Astana qalasynyń para-hokkeı federatsııasy júgindi. Federatsııa negizinde para-hokkeıden Qazaqstannyń birinshi jáne jalǵyz quramasy qurylǵan. Parasportshylardyń tájirıbesi bar, Reseıde ótken chempıonattarda birqatar jetistikterge qol jetkizgen. Alaıda, bul jarystarǵa sonaý 2017 jyly satyp alynǵan quraldarymen qatysyp júrdi. Al, sporttyq qural-jabdyqtardyń qyzmet merzimi – nebári 5 jyl. Osylaısha, Qor qazaqstandyq quramanyń para-hokkeıden halyqaralyq jarystarǵa daıyndalýy jáne qatysýy úshin sporttyq qural satyp alýdy qarjylandyrdy. Komandaǵa 12,4 mıllıon teńge somaǵa 50 syrǵytpa taıaq pen 16 shana satyp alyndy. Jańa syrǵytpa taıaqtarmen Qazaqstan quramasy S pýlyndaǵy Taılandtaǵy chempıonatta kúmis júldeger atanyp, joǵary lıgaǵa joldama men V tobynyń chempıonatynda oınaýǵa múmkindik aldy. Endigi tańda sportshylar kóktemde Slovakııa quramasymen ótetin joldastyq kezdesýge daıyndyq ústinde.
Qor elimizdiń parasportshylaryna arnalǵan sporttyq-júgirý protezderin jasaý boıynsha qaıyrymdylyq baǵdarlamasyn júzege asyrýdy bastady. Dál osy paralımpıadalyq sport túrinde Qazaqstan usynylmaǵan, oǵan sporttyq protezderdiń qymbattyǵy da sebep. Ulttyq paralımpıada komıtetiniń málimeti boıynsha, elde 70-ke jýyq aıaq-qol ampýtatsııalanǵan sportshy bar jáne tek bir ǵana sportshynyń júgirýge qatysýy úshin sporttyq protezi bar. Qor jalpy somasy 113,4 mln teńgege 10 protez ázirleýdi josparlan otyr. Árbir protezdik-ortopedııalyq buıym jeke bolǵanymen, sportshy aýystyrylǵan jaǵdaıda salystyrmaly fızıkalyq parametrleri uqsas kez kelgen parasportshy ony paıdalana alady.
Foto: «Qazaqstan halqyna» qory
