«Qazaqstan halqyna» qory úshinshi balaǵa ekzoskelet tabystady
Sanjar kópbalaly otbasynan shyqqan. Aqmola oblysynyń Talapker aýylynda turady. Ákesi Mádı Ápendınniń aıtýynsha, eki jasynda dárigerler balaǵa tserebraldy sal aýrýy dıagnozyn qoıǵan. Sodan beri túrli memlekettik jáne jeke medıtsınalyq uıymdarda emdelip, ońaltýdan ótken. Balasynyń aıaqqa turýyn tilegen ata-ana, tipti, halyq emshilerine de júgingen eken.
«Kez kelgen ata-ana sekildi, biz de ártúrli emdeý joldaryn izdedik, eshqashan moıyǵan emespiz. Sondyqtan ekzoskeletten úmitimiz zor. Osyǵan deıin ata-analar men mamandardan ekzoskelettiń tıimdiligi týraly estigenbiz. Onyń kómegimen ózdiginen júre bastaǵan balalar bar eken», - deıdi Mádı Ápendın.
Qazir Sanjar júris quralymen júre alady. Boksqa qyzyǵýshylyǵy joǵary. Qurdastarymen birge sport sektsııalaryna qatysa alatyn sátti asyǵa kútýde. Qazir bolsa úıde bokstyń ádisterin meńgerýde.
«Men de bári sııaqty aıaq basyp júrgim keledi. Úıde aǵammen jekpe-jek jasaımyz. Biraq sport úıirmelerine jeke qatysyp, barǵym keledi», - deıdi Sanjar.
Sportpen qatar, ol kórkem ádebıetke qyzyǵýshylyq tanytyp, jýrnalıst bolýdy armandaıdy.
«Men jýrnalıst atanǵym keledi. Teledıdardan jańalyqtardy kórgendi unatamyn. Óskenimde Erqanat Kópjasar sııaqty júrgizýshi bolǵym keledi. Maǵan onyń baǵdarlamany qalaı júrgizetini óte unaıdy», - dedi Sanjar Serik.
Bes kún ishinde Sanjar Balalardy ońaltýdyń ulttyq ortalyǵynda (BOUO) ákesimen, dárigerlermen, «Mbionics» otandyq óndirýshi kompanııasynyń mamandarymen birge ekzoskeletti synaqtan ótkizdi. Testileý jáne oqytý qorytyndysy boıynsha, sondaı-aq BOUO janyndaǵy pánaralyq toptyń maquldaýy boıynsha ekzoskelet berildi.
Esterińizge sala keteıik, osyǵan deıin «Qazaqstan halqyna» qory sal aýrýyna shaldyqqan eki balaǵa ekzoskelet alyp berdi.
«Qazaqstan halqyna» qoǵamdyq qorynyń málimetinshe, ekzoskelettermen qamtamasyz etý jónindegi qaıyrymdylyq baǵdarlamasy tirek-qımyl apparaty buzylǵan (tserebraldy sal aýrýy, mı jaraqattary, julynnyń zaqymdanýy, paraplegııa, bulshyqet dıstrofııasy, Rett sındromy jáne t.b.) halyqtyń áleýmettik osal toptarynan shyqqan balalarǵa arnalǵan. Baǵdarlama aıasynda 13 balaǵa 117 mln teńge kóleminde qurylǵy satyp alynady: bir ekzoskelettiń quny 9 mln teńge.
Jobanyń seriktesi patsıenttik uıym bolyp tabylatyn «CyberFund» qaıyrymdylyq qory balalardyń qujattaryn ázirleý jáne jınaýdy júzege asyrady.
Ekzoskeletti óndirýshi — «Mbionics» otandyq kompanııasy. Baǵdarlama aıasynda salmaǵy 25 kılogramm bolatyn árbir ekzoskelet ár balanyń jeke qajettilikteri men fızıologııalyq parametrlerin eskere otyryp jasalady. Bıiktigi 130–dan 160 sm-ge deıin jáne salmaǵy 60 kg-ǵa deıingi balalarǵa arnalǵan ekzoskelet shyǵaralady. Ekzoskelettiń qyzmet etý merzimi – 5 jyl. Óndirýshi kompanııa bir jyl ishinde apparattyń jumysyna baqylaý júrgizedi.
Foto: qazaqstanhalqyna.kz