«Qazaqstan halqyna» qory Qostanaı oblysyna 40 tonna gýmanıtarlyq kómek jiberdi

ALMATY. QazAqparat – «Qazaqstan halqyna» qaıyrymdylyq qorynyń gýmanıtarlyq kómegi Qostanaı oblysyna jetkizildi. Bul týraly óńirlik kommýnıkatsııalar qyzmeti uıymdastyrǵan onlaın sharada «Qazaqstan halqyna» qaıyrymdylyq qory qamqorshylyq keńesiniń múshesi, «ıAalmatınets» qoǵamdyq birlestiginiń birlesken jetekshisi Saıda Táýkeleva aıtty, dep habarlaıdy QazAqparat tilshisi.

«Qostanaı oblysyndaǵy tótenshe jaǵdaıǵa baılanysty aldynkúnnen beri shuǵyl túrde gýmanıtarlyq kómekti jınaýdy bastaǵanbyz. Keshe 40 tonna gýmanıtarlyq kómek Nur-Sultannan Qostanaı qalasyna jóneltildi. Búgin biz Qostanaı qalasyna ushyp keldik. Ary qaraı gýmanıtarlyq kómekti túsirip, ony taratý úshin tıisti lokatsııaǵa baratyn bolamyz» - dedi spıker.

Sonymen birge Saıda Táýkeleva «Qazaqstan halqyna» qaıyrymdylyq qoryna kelip túsetin ótinimder týraly aıtyp berdi.

«Bastapqy kezde qordyń jumysyna qatysy joq ótinimder kelip túsetin. Mysaly, nesıeni jabýǵa kómektesý, tipti, toı ótkizýge aqshalaı kómektesý týraly bolǵan. Al qazir sheteldegi qymbat emdelýler boıynsha ótinimder kóp túsedi. Aıta keteıin, ondaı máseleler qormen qarastyrylmaıdy. Sondaı-aq, qymbat emdelýdi Qazaqstan aýmaǵynda jasaý qajet bolsa da, ondaı ótinimder qarastyrylmaıdy. Sebebi, munda kóptegen nıýans pen zań normatıvteri bar», - dedi Saıda Táýkeleva.

Aıta keteıik, budan bólek búgin almatylyqtar Qostanaıda órt saldarynan zardap shekken turǵyndarǵa 2 júk kóligimen 120 tonna gýmanıtarlyq kómek jiberdi.

«Qalamyzdyń kúshimen barlyǵy 120 tonna kómek jınaldy, onyń ishinde azyq-túlik, kıim-keshek, birinshi kezekte qajetti zattar, sondaı-aq turmystyq tehnıka, qurylys materıaldary jáne arnaıy jabdyqtar (benzın generatorlary, qurylys quraldary jáne taǵy basqalar)»,- dep habarlady qalalyq ákimdikten.

Sondaı-aq, Almatyda taǵy 4 júk kóligin jóneltýge daıyndap jatyr.