«Qazaqstan halqyna» qory qańtar oqıǵasynan zardap shekkenderge 2 mlrd teńgeniń kómegin kórsetti

ASTANA. QazAqparat - «Qazaqstan halqyna» qoǵamdyq qory qaıǵyly qańtar oqıǵalary barysynda zardap shekken 540 adamǵa jalpy somasy 2 mlrd 112 mln teńgege qaıyrymdylyq kómek kórsetti, dep habarlaıdy QazAqparat atalǵan qordyń baspasóz qyzmetine silteme jasap.

Atap aıtqanda:

- qaza tapqan 19 áskerı qyzmetshiniń, ishki ister jáne Ulttyq qaýipsizdik organdarynyń qyzmetkerleriniń otbasylaryna - 133 mln teńge (7 mln teńgeden);

- Aýyr jaraqat alǵan 111 áskerı qyzmetshige, ishki ister jáne Ulttyq qaýipsizdik organdarynyń qyzmetkerlerine - 333 mln teńge (3 mln teńgeden);

- Qaza tapqan áskerı qyzmetshilerdiń, ishki ister organdary men ulttyq qaýipsizdik organdary qyzmetkerleriniń otbasylaryndaǵy 23 kámeletke tolmaǵan balaǵa - 46 mln teńge (árbir kámeletke tolmaǵan balaǵa 2 mln teńgeden);

- qańtar oqıǵalarynyń kezdeısoq qurbany bolǵan QR 135 azamatynyń otbasylaryna - 945 mln teńge (7 mln teńgeden);

- kezdeısoq qurban bolǵan Qazaqstan Respýblıkasynyń qaza tapqan azamattarynyń otbasylaryndaǵy 101 kámeletke tolmaǵan balaǵa - 202 mln teńge (árbir kámeletke tolmaǵan balaǵa 2 mln teńgeden);

- atys qarýynan zardap shekken jáne jábirlenýshi dep tanylǵan 138 aýyr jaralanǵan kámeletke tolǵan azamattarǵa - 414 mln teńge (3 mln teńgeden);

- qańtar oqıǵasy kezinde jaraqat alǵan 13 balanyń otbasylaryna - 39 mln teńge (3 mln teńgeden).

Qor saıtynda qaıyrymdylyq kómek alǵan azamattardyń tizimi jarııalanǵan.

Qaza tapqan jáne aýyr jaralanǵan áskerı qyzmetshilerdiń, ishki ister jáne Ulttyq qaýipsizdik organdary qyzmetkerleriniń, sondaı-aq qaza tapqandardyń otbasylarynda qalǵan kámeletke tolmaǵan balalardyń tizimderin Qorǵa osy vedomstvolardyń ortalyq apparattary usyndy.

Bul rette Qor qaza tapqan áskerı qyzmetshilerdiń, ishki ister jáne Ulttyq qaýipsizdik organdary qyzmetkerleriniń otbasylaryna; aýyr jaralanǵan áskerı qyzmetshilerge, ishki ister jáne Ulttyq qaýipsizdik organdary qyzmetkerlerine jáne jaralanǵan balalardyń otbasylaryna (kámeletke tolmaǵan balalar) qaıyrymdylyq kómek kórsetýdi tolyq aıaqtady.

Kezdeısoq qurban bolǵan Qazaqstan Respýblıkasynyń qaza tapqan azamattarynyń otbasylaryndaǵy kámeletke tolmaǵan balalardyń (2022 jyldyń 9 qańtardaǵy jaǵdaı boıynsha 18 jastan aspaǵan) tizimderi QR qaza tapqan azamattar boıynsha qujattar jınaý barysynda qalyptastyryldy.

Búgingi tańda Qor qańtar aıyndaǵy oqıǵalardyń kezdeısoq qurbany bolǵan QR qaza tapqan azamattarynyń 12 otbasyna jáne atys qarýynan zardap shekken jáne jábirlenýshi dep tanylǵan 131 aýyr jaralanǵan kámeletke tolǵan azamattarǵa qaıyrymdylyq kómek kórsetýdi jalǵastyrýda.

Sonymen qatar, QR Bas prokýratýrasy oblystardyń, respýblıkalyq mańyzy bar qalalardyń jáne astananyń ákimdikterimen birlesip, Qorǵa atys qarýynan zardap shekken QR aýyr jaraqat alǵan kámeletke tolǵan azamattary boıynsha qajetti qujattardy jınaýǵa kómek kórsetýde.