«Qazaqstan halqyna» qory bilim granttaryna qatysatyn JOO tizimin jarııalady

NUR-SULTAN. QazAqparat - «Qazaqstan halqyna» qaıyrymdylyq qory bilim granttary» baǵdarlamasyna qatysatyn joǵarǵy oqý oryndary men qaıyrymdylyq uıymdary tizimin jarııalady, dep habarlaıdy QazAqparat qordyń resmı saıtyna silteme jasap.

Atalǵan qaıyrymdylyq baǵdarlamasyna joǵary bilim baǵdarlamalaryn iske asyratyn 75 bilim berý uıymy men bilim berý salasyndaǵy 2 qaıyrymdylyq uıym qatysady.

Joǵary bilim berý uıymdary ótkizetin konkýrstardyń qorytyndylary boıynsha bilim granttary men shákirtaqylardy berý úshin baǵdarlama qatysýshylaryn irikteý krıterııleri mynadaı:

UBT-dan ótken jáne onyń nátıjeleri boıynsha JOO-ǵa túsý úshin qajetti ótý balyn jınaǵan talapkerlerden:

aýyldyq jerlerdegi az qamtylǵan otbasylardan shyqqan tulǵalar;

jetimderge jatatyn jáne kámeletke tolǵanǵa deıin ata-anasynyń qamqorlyǵynsyz qalǵan tulǵalar;

múmkindigi shekteýli, onyń ishinde múgedektigi bar tulǵalar.

Bakalavrıat baǵdarlamalary boıynsha kúndizgi bólimde oqıtyn stýdentterden:

múmkindigi shekteýli, onyń ishinde múgedek tulǵalar;

jetimderge jatatyn jáne kámeletke tolǵanǵa deıin ata-anasynyń qamqorlyǵynsyz qalǵan tulǵalar;

aýyldyq jerlerdegi az qamtylǵan otbasylardan shyqqan tulǵalar;

múgedek balalardy tárbıelep otyrǵan tolyq emes otbasylardan shyqqan tulǵalar;

ata-anasynyń bireýi nemese ekeýi de múgedek tulǵalar.

2022-2023 oqý jylyna arnalǵan «Qazaqstan halqyna» QQ bilim granttary» qaıyrymdylyq baǵdarlamasyna qatysatyn 75 JOO men stýdentter ótinim bere alatyn qaıyrymdylyq uıymdardyń tizimin qordyń resmı saıtynan kórýge bolady.