«Qazaqstan halqyna» qory aýyldarǵa «100 sportzal» jobasyn qolǵa aldy

NUR-SULTAN. QazAqparat – Elimizde aýyldyq jerlerde «100 sport zal» salynady. Atalǵan bastamany «Qazaqstan halqyna» qory qolǵa alyp otyr, dep habarlaıdy QazAqparat tilshisi.

«Bizdiń qor «100 sport zal» jobasyn qolǵa aldy. Jobanyń ereksheligi sol, sport zaldar tek aýyldarda salynady. Bıyl jospar boıynsha 24 sport zal iske qosylýy tıis», - dedi «Qazaqstan halqyna» qoǵamdyq qorynyń basqarma tóraǵasy Bolat Jámishev elordada ótken baspasóz máslıhatynda.

Odan bólek, qor basshysy aýyl turǵyndaryna bilim berýge qatysty tyń bastama týraly aıtty.

«Aýyl - bizdiń kómek baǵyttalatyn negizgi aýdıtorııanyń biri. Aýyl turǵyndaryna qatysty bizdi tolǵandyratyn taǵy bir másele - bilim berý. Ózderińiz biletindeı Qazaqstan halqynyń jartysyna jýyǵy aýyldyq jerlerde turady. Osy oraıda biz 17 óńir boıynsha Nazarbaev zııatkerlik mektebiniń bilim berý júıesi negizinde aýyldarda 17 mektep ashý ıdeıasyn usyndyq. Nátıjesinde taıaýda ǵana Aqmola oblysynyń Qatarkól aýylynda alǵashqy mektep ashyldy», - deıdi ol.

Buǵan deıin Bolat Jámishev Qostanaı oblysynda bolǵan orman órti saldarynan zardap shekken jandarǵa qor atynan kómek kórsetiletini týraly aıtqan edi.

Odan bólek, «Qazaqstan halqyna» qorynan kómek suraıtyn el azamattarynyń deni densaýlyq jaǵdaıy boıynsha júginetini belgili boldy.