Qazaqstan halqyna dostyq pen beıbitshilik tileımin - Tájikstannyń Qazaqstandaǵy Tótenshe jáne Ókiletti Elshisi

ASTANA. Tamyzdyń 30-y. QazAqparat /Marlan Jıembaı/ - Qazaqstan halqyna dostyq pen beıbitshilik tileımin. Bul tilekti búgin QR Konstıtýtsııasynyń 15 jyldyǵyna arnalǵan elordadaǵy «Qazaq eli» monýmentiniń aldyndaǵy áskerı sherýden keıin QazAqparat tilshisine bergen suhbatynda Tájikstannyń Qazaqstandaǵy Tótenshe jáne Ókiletti Elshisi Bahrom Holnazarov bildirdi.

«Barlyq qazaqstandyqtardy Konstıtýtsııa kúnimen quttyqtaımyn. Qazaqstan halqyna dál osyndaı dostyq pen beıbitshilikte ómir súrýin jáne sizderdiń memleketterińizdiń jyldan jylǵa qarqyndy damyp, budan da qýatty bola túsýin tileımin», dedi ol óz sózinde.

Sonymen qatar ol taıaýda Qazaqstanǵa Tájikstan Respýblıkasynyń Syrtqy ister mınıstri Hamrohon Zarıfıdiń resmı saparmen kelip, qazaq Úkimetimen eki jaqty saýda-ekonomıkalyq qatynastardyń damý máselelerin talqylaǵandyǵyn aıta kelip, «Qazaqstan men Tájikstan arasynda sheshilmeıtin másele joq. Biz árqashanda da bir-birimizdi qoldaımyz. Qazirgi tańda Qazaqstan Tájikstanǵa mol qoldaý kórsetip otyr», dep qorytty sózin Tájikstannyń Qazaqstandaǵy Tótenshe jáne Ókiletti Elshisi.