Qazaqstan halqyn taza aýyz sýmen tolyq qamtamasyz etýge áli 10 jyl kerek
ASTANA. QazAqparat - Qazaqstan halqyn taza aýyz sýmen tolyq qamtamasyz etýge áli 10 jyl kerek. Bul týraly búgin QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov aıtty, dep habarlaıdy QazAqparat.
«Aýyldyq eldi mekenderdi sýmen qamtamasyz etý máselesin tolyqtaı sheshý úshin mınıstrlik atalǵan problemany sheshýdiń túrli joldaryn izdep, júıeli sharalar qabyldaýda. Máselen, búgingi kúni respýblıkadaǵy 6 601 eldi mekenniń 4 034-i ortalyqtandyrylǵan sýmen qamtamasyz etýmen qamtylmaǵan. Olarda 2,7 mln adam turyp jatyr. Onyń 1 462-si jańa qurylysty, 1 104-i jańǵyrtýdy talap etedi. Atalǵan 1 104 eldi mekende sý táýligine 12 saǵattan az beriledi», - dedi mınıstr elimizdiń eldi mekenderin sapaly aýyz sýmen qamtamasyz etýdiń ózekti máselelerine arnalǵan parlamenttik tyńdaý barysynda.
Onyń dereginshe, 1 452 eldi mekende 200-den az, al 16 eldi mekende 500-ge jetpeıtin adam turady. Sonymen qatar atalǵan eldi mekenderdiń damý áleýeti de tómen. ıAǵnı, ortalyqtandyrylǵan sýmen qamtamasyz etý júıesin salý ekonomıkalyq turǵyda tıimsiz.
«Osylaısha, 2,7 mln adamdy tolyqtaı aýyz sýmen qamtamasyz etý úshin tipti qazirgi jyl saıynǵy qarjylandyrý kólemin saqtap qalǵannyń ózinde problemany sheshý 2027 jyly ǵana múmkin bolmaq. Jyldyq qarjylandyrýdy 100 mlrd teńgege deıin jetkizgende 2025 jylǵa qaraı sheshýge bolar edi. Jalpy soma 717 mlrd teńgeni quraıdy», - dedi Asqar Myrzahmetov.
