Qazaqstan halqyn qaı máseleler kóp tolǵandyrady
NUR-SULTAN. QazAqparat – Búgin Úkimet otyrysynda QR Aqparat jáne qoǵamdyq damý mınıstri Asqar Omarov memlekettik organ basshylarymen kezdesý kezinde turǵyndar jıi kóteretin máselelerdi atady, dep habarlaıdy QazAqparat tilshisi.
«Mınıstrler óńirlerdegi kezdesýler kezinde azamattardyń birqatar ózekti máselesin anyqtady. Halyqty neǵurlym kóp tolǵandyratyn máselelerge toqtalsaq, olardyń arasynda qalalar men aýyldy eldi mekenderdegi uıaly baılanys pen ınternet sapasy, óńirlerge elektr jáne gaz jelisin tartý, sapaly aýyz sýmen qamtamasyz etý problemasy bar. Sonymen qatar mindetti áleýmettik medıtsınalyq saqtandyrý, ónerkásip kásiporyndary qyzmetkerleriniń jalaqysyn kóterý, múmkindigi shekteýli jandardyń máseleleri kóterildi», - dedi A. Omarov.
Sonymen qatar óńir turǵyndary bilim berý uıymdarynyń basshylaryn rotatsııalaý, bala asyrap alý, qashyqtan oqytý formaty, oqý baǵdarlamalaryn jańartý, sport sektsııalary men shyǵarmashylyq úıirmelerin jan basyna qarjylandyrýǵa qatysty taqyryptaryn qozǵaǵan.
«Mınıstrlerdiń jáne ákimderdiń kezdesýlerinde halyq kótergen problemalardy salystyrmaly taldaý vedomstvoaralyq deńgeıde sheshýdi talap etetin 2 máseleniń shyǵý tórkini uqsas ekenin kórsetti. Bul mindetti áleýmettik medıtsınalyq saqtandyrý, sport sektsııalary men shyǵarmashylyq úıirmelerdi jan basyna qarjylandyrý máselelerine qatysty», - dedi vedomstvo basshysy.
Budan buryn habarlanǵandaı, Úkimet basshysy keıbir óńirlerde basshylar halyqpen kezdesýdiń jańa formatyna beıimdelmeı, eski súrleýden shyǵa almaı otyrǵanyn synady.
Úkimet otyrysynda bıyldan bastap ortalyq jáne jergilikti atqarýshy organ basshylarynyń óńirlerge baryp, halyqpen júzbe-júz kezdesý ótkizýdiń jańa tártibi júzege asyrylyp jatqany aıtyldy.
