Qazaqstan halqy turaqtylyq pen gúldený jolyn jemisti jalǵastyratynyna senemin -QR Prezıdenti N. Nazarbaev
ASTANA. 8 sáýir. QazAqparat / Qanat Mámetqazyuly/ -Qazaqstan halqy turaqtylyq pen gúldený jolyn jemisti jalǵastyratynyna senemin.
Búgin Astanadaǵy Táýelsizdik saraıynda ótken ulyqtaý rásiminde Qazaqstan halqyna Ant berip, jańa prezıdenttik merzimge resmı kiriskennen keıin sóılegen sózinde QR Prezıdenti Nursultan Nazarbaev osylaı málimdedi.
Óz sózinde Prezıdent búkil álemge yqpaldastyq pen ashyqtyq Qazaqstannyń sanaly sheshimi ekendigin aıtty. Budan bólek, Elbasy Reseı men Belarýs memleketterimen birge Qazaqstan Keden odaǵyn damytatynyn, jaqyn jyldary Eýrazııalyq ekonomıkalyq odaqty qalyptastyrý úshin jumystar atqarylatynyn, sondaı-aq Qytaı Halyq Respýblıkasymen ózara tıimdi yntymaqtastyqty ustanatynymyzdy atap ótti.
«Qazaqstan AQSh-pen, Eýropalyq odaq elderimen strategııalyq áriptestiktiń nyǵaıýyna nıetti. Biz Ortalyq Azııadaǵy kórshiles memlekettermen, túrki memleketterimen asa tyǵyz baılanysta bolamyz. Qazaqstannyń aǵymdaǵy jyly Islam Konferentsııasy uıymyna tóraǵalyq etýi barysynda biz barlyq Islam álemimen yntymaqtastyqty arttyrýǵa nıettimiz. Ortalyq Azııadaǵy qaýipsizdik júıesiniń tıimdiligin arttyrý Qazaqstannyń EQYU, AÓSShK, ShYU jáne UQShU qyzmetterine belsendi qatysýyna, sondaı-aq NATO-men áriptestikti keńeıte túsýine de baılanysty. Men Qazaqstan halqy turaqtylyq pen gúldený jolyn jemisti jalǵastyratynyna senemin. Búgingi Qazaqstan óz aldyna joǵary maqsattar, bıik murattar men ambıtsııalar qoıa biletin jáne onyń oryndalýyna qol jetkize alatyn memleket. Biz buny dáleldedik, ony taǵy da dáleldeıtin bolamyz», - dedi N. Nazarbaev.
