Qazaqstan halqy Tuńǵysh Prezıdent kúni merekesin toılaýda

ASTANA. QazAqparat - Búgin - 1 jeltoqsan - Qazaqstan Respýblıkasynyń Tuńǵysh Prezıdenti kúni. Bul merekeniń shyǵý tórkinine sholý jasar bolsaq, 2011 jyldyń 10 jeltoqsany kúni QR Parlamenti Senaty depýtattarynyń bastamasymen «Qazaqstan Respýblıkasyndaǵy merekeler týraly» QR Zańyna tolyqtyrý engizý týraly» QR Zańy

qabyldanǵan bolatyn. Zań 1 jeltoqsanda atalyp ótiletin Qazaqstan Respýblıkasynyń Tuńǵysh Prezıdenti Kúnin belgilegen edi. Osy oraıda Qazaqstanda keńinen atalyp ótiletin bul mereke nege 1 jeltoqsan kúnine belgilendi degen zańdy suraq týyndaıdy. Rasynda, tańdaý bul kúnge teginnen-tegin túsken otyrǵan joq. Este bolsa, 1991 jyldyń 1 jeltoqsan kúni táýelsiz Qazaq elinde alǵashqy prezıdenttik saılaý ótip, onda Nursultan Nazarbaev halyqtyń zor senimimen, ıaǵnı saılaýshylardyń 98,78 paıyz daýysymen jeńiske jetken edi. Bul kún tarıh sahnasyna táýelsiz el retinde kóterilgen Qazaqstannyń saıası ómirinde erekshe mánge ıe bolyp, aıtýly dataǵa aınaldy. Ony urpaq jadynda berik saqtap, táýelsizdigimizdiń irgetasyn nyǵaıtqan eleýli tarıhı oqıǵa retinde tereń baǵalaı bilýimiz úshin bul merekeniń mańyzy zor.

Jalpy, Táýelsiz Qazaqstannyń dúnıege kelýiniń uly shejiresi birqatar tarıhı kezeńderden turady. Olar: 1990 jyldyń sáýiri - N.Nazarbaevty Respýblıka Prezıdenti laýazymyna taǵaıyndaý, 1990 jyldyń qazany - Qazaqstannyń táýelsizdigi týraly Deklaratsııa, 1991 jyldyń tamyzy - Semeı ıadrolyq synaq polıgonynyń jabylýy jáne Respýblıkalyq egemen altyn-valıýta qoryn qurý, 1991 jyldyń jeltoqsany - alǵashqy búkilhalyqtyq prezıdenttik saılaý, bizdiń memleketmizdiń jańa ataýy týraly sheshim qabyldaý, 16 jeltoqsan - «Qazaqstannyń memlekettik táýelsizdigi týraly» Konstıtýtsııalyq Zańdy qabyldaý, 1993 jyldyń 15 qarashasy - ózimizdiń ulttyq valıýtany jáne qarjy júıesin engizý. Biraq, Elbasymyz N.Nazarbaev aıryqsha atap ótetin Táýelsizdik jolyndaǵy shejirede Qazaqstan halqy sol bir taǵdyrsheshti kezeńde júrip ótken úsh sheshýshi tarıhı beles bar. Onyń birinshisi - bizdiń elimizdiń alǵashqy absolıýtti egemen memlekettik aktisi - Semeı polıgonyn jabý týraly Jarlyqqa qol qoıylýy. Ekinshi beles - 1991 jyldyń 1 jeltoqsanynda bizdiń halqymyzdyń búkil tarıhynda alǵash ret ótken jalpyǵa ortaq Qazaqstan Prezıdenti saılaýy. Úshinshi beles - «Qazaqstan Respýblıkasynyń Memlekettik táýelsizdigi týraly» Konstıtýtsııalyq zańnyń qabyldanýy.

Aıta keteıik, bul kún memlekettik mereke retinde jalpyhalyqtyq deńgeıde 2012 jyldan beri toılanyp keledi.