Qazaqstan halqy tilderiniń festıvali aıasynda alǵash ret «Innovatsııalyq kún» sharasy ótedi
ASTANA. 28 tamyz. QazAqparat - Búgin Astanada Qazaqstan halqy tilderiniń XV festıvali saltanatty túrde ashylady. Bul týraly arnaıy baspasóz máslıhatyn uıymdastyrǵan Tilderdi damytý basqarmasynyń bastyǵy Erbol Tileshov málim etti.
Onyń habarlaýynsha, festıvaldiń saltanatty ashylý rásimi búgin keshqurym Kúlásh Baıseıitova atyndaǵy ulttyq opera jáne balet teatrynda ótedi. Sodan bastap qyrkúıektiń 20-syna deıin san alýan mádenı-ıntellektýaldyq sharalar uıymdastyrylady. Atap aıtqanda, Astananyń №56 mektebinde - orys synyptarynda oqıtyn qazaq balalary arasynda qalalyq til olımpıadasy (11-12 qyrkúıek), №4 mektepte - «Til halyq janyn tanýdyń kilti» baıqaýy (17-18 qyrkúıek), sondaı-aq basqa da is-sharalar ótedi. «Bıylǵy festıvaldiń ereksheligi sol, alǵash ret qazaq tilin oqytýdyń jańa tehnologııalaryna arnalǵan «Innovatsııalyq kún» sharasy uıymdastyrylmaq. Bul shara 5 qyrkúıek kúni Lev Gýmılev atyndaǵy Eýrazııa ulttyq ýnıversıtetinde ótedi», - deıdi E.Tileshov.
