Qazaqstan halqy ótken ǵasyrda oryn alǵan oqıǵalardy umytpaýy kerek - Prezıdent

ASTANA. QazAqparat - HH ǵasyrdaǵy náýbetti kezeń barsha Qazaqstan halqyn jaqyndatty. Bul týraly búgin Astanada «Máńgilik El: bir el - bir taǵdyr» taqyrybymen ótip jatqan Qazaqstan halqy Assambleıasynyń HHІІ sessııasynda QHA Tóraǵasy, Elbasy Nursultan Nazarbaev málim etti.

«HH ǵasyrdyń basynan beri Qazaqstanǵa 5,6 mln. adam qonys aýdardy. Al sol kezde jalpy Qazaqstannyń halqy 6 mıllıonǵa jýyq (jergilikti qazaqtar) bolatyn. 5,6 mıllıon adam jasandy is-qımyldar arqyly elimizge kóshirildi. Bul málimetter Qazaqstan ejelden osylaı kópultty boldy dep sanaıtyn tarıhty bilmeıtinderdiń nazaryna», - dedi Prezıdent.

Osy oraıda Elbasy elimizdiń halqy ótken ǵasyrda oryn alǵan oqıǵalardy este saqtaýy kerektigin atap ótti.

Stalındik qylmystyq ujymdastyrýdyń saldarynan 1,5 mıllıon qazaqtyń ashtan qyrylǵanyna, sol kezeńde halyqtan kúnkórisi bolǵan maldy tartyp alǵandyǵyna toqtalǵan Memleket basshysy: «Qonys aýdarylǵandar ǵana emes, barshamyz qaıǵy-qasiretti bastan ótkerdik. Sondyqtan bir-birimizge jaqyndyqty sezinemiz», - dedi.