Qazaqstan halqy men Prezıdentine alǵys aıtamyn – Túrkııa Elshisi

ASTANA. QazAqparat – Túrkııa Respýblıkasynyń Qazaqstandaǵy Tótenshe jáne ókiletti elshisi Ýfýk Ekıdjı qazaqstandyqtarǵa tilektestik peıilderi úshin alǵys bildirdi, dep habarlaıdy QazAqparat tilshisi.

«Qazaqstan Respýblıkasynyń Syrtqy ister mınıstrligi arqyly jáne basqa da qyzmetkerlerge zilzala týraly alǵashqy aqparat bergende alǵashqy sátten bastap qazaqstandyq baýyrlarymyz ár túrli qoldaý kórsetýge daıyn ekenderin málimdedi.

Osy oraıda men QR Prezıdenti Qasym-Jomart Toqaev myrzaǵa jáne basqa da barlyq memlekettik organdaryna, mekemelerine bizge tilektestik bildirip, qoldaý kórsetkenderi úshin alǵysymdy bildirgim keledi. Dúısenbi kúni Prezıdent Q.Toqaev myrza bizdiń eldiń prezıdentine kóńil aıtqan jedelhat joldady. Sol kúni taǵy da telefon arqyly suhbattasty. Suhbat kezinde de baýyrlas el retinde qaıǵymyzǵa ortaqtasty.

Qazaqstandyqtar kóńil aıtyp qana qoımaı qarjylaı, materıaldyq kómek kórsetýge daıyn ekenin bildirip jatyr», - dedi Ýfýk Ekıdjı Astanadaǵy elshilikte ótken brıfıngide.

Búgin Prezıdent Qasym-Jomart Toqaev Túrkııa Respýblıkasynyń Qazaqstandaǵy elshiligine kelip, baýyrlas eldiń ońtústik-shyǵysynda bolǵan alapat zilzala saldarynan myńdaǵan adamnyń qaza tabýyna baılanysty kóńil aıtty.

Anadolý agenttiginiń málimetinshe, Túrkııadaǵy eki joıqyn jer silkinisinen qaza tapqandar sany 6234-ke jetip, 37 011 adam jaraqat alǵan.

Sońǵy málimetter boıynsha, Túrkııada úsh qazaqstandyq izdestirilip jatyr.