Qazaqstan halqy eldegi turaqtylyqty joǵary baǵalap otyr – Talǵat Qalıev

ASTANA. QazAqparat – Halyq aldaǵy jeti jyldyq merzimde jarııalanǵan bastamalardyń oryndalýyn kútip otyr. Bul týraly «QSZI GPS» saraptama alańynyń otyrysynda Etnosaıası zertteýler ınstıtýtynyń dırektory Talǵat Qalıev málim etti, dep habarlaıdy QazAqparat tilshisi.

Onyń aıtýynsha, saılaýǵa halyqtyń basym bóliginiń qatysýyna Qazaqstan qoǵamynyń eldegi turaqtylyqty saqtap qalýy turǵysyndaǵy talpynysy áser etti. Óıtkeni álemdegi bolyp jatqan shıelenister halyqty alańdatyp otyr.

«Qazaqstan halqy turaqtylyqty odan saıyn baǵalaı bastady. Qasym-Jomart Toqaevqa berilgen 82 paıyz daýysqa toqtalsaq, halyq aldaǵy jeti jyldyq merzimde jarııalanǵan bastamalardyń oryndalýyn kútip otyrǵanyn bildiredi. Kandıdatqa daýys bergen halyq birigý qabiletin kórsetti. Osy oraıda, qoǵam bıliktiń barlyq áreketine, kadrlyq saıasatyna, jańa sheshimderine joǵary talappen baǵa beretin bolady», - dedi T. Qalıev.

Onyń paıymynsha, qoǵam aldaǵy parlamentti saılaý naýqanyna deıin tıisti ózgeristerdiń óz kúshine enýin kútip otyr. Bul turǵyda kún tártibinde ekonomıkany, bank sektoryn monopolııasyzdandyrý, memlekettik basqarýdyń barlyq paradıgmasynyń túbegeıli ózgerýi tur.

Budan buryn habarlanǵandaı, naqtylanǵan saılaýshylar tizimderine saı, jalpy saılaýshylar sany 11 mln 953 myń 465 adamdy qurady. Onyń 8 mln 300 myń 46 adamy nemese 69,44 paıyzy daýys berýge arnalǵan bıýlletenderdi aldy.