Qazaqstan halqy belsendi azamattyq ustanymyn kórsetip jatyr - Sabır Gadjıev

NUR-SULTAN. QazAqparat – Qazaqstan halqy belsendi azamattyq ustanymyn kórsetip jatyr. Bul týraly TMD PAA ókilderi tobynyń úılestirýshisi, Ázerbaıjan Respýblıkasy Mıllı Medjlısiniń agrarlyq saıasat komıteti tóraǵasynyń orynbasary Sabır Gadjıev málim etti, dep habarlaıdy QazAqparat tilshisi.

«Búgin ýchaskeler ashylǵan kezden bastap azamattardyń daýys berýge belsendi qatysyp jatqany bizdi qýantty. Tańerteń ýchaskelerde biraz adam jınalǵanyn baıqadyq. Bizdiń top Nur-Sultan, Almaty qalalaryna jáne el óńirlerine baıqaýshy retinde bardy. Toptyń quramynda senatorlar, depýtattar, parlament ókilderi, halyqaralyq monıtorıng ınstıtýtynyń sarapshylary bar», - dedi Sabır Gadjıev «Qazmedıa» ortalyǵynda ótip jatqan «Referendým» onlaın-marafonynda.

Sonymen qatar, ol kesheden beri Qazaqstanda birqatar kezdesý ótkizgenin aıtty.

«Jalpy, referendýmǵa daıyqtyń barysymen egjeı-tegjeıli tanysyp shyqtyq. Búgin tańerteń ýchaskege barǵan kezde, rásimderdiń barlyǵy qabyldanǵan qujat aıasynda júrgizilip jatqanyn kórdik. Demalys kúni bolǵandyqtan, turǵyndar daýys berýge keshteý keledi dep oılaǵanbyz. Alaıda, adamdar ýchaskelerge qaraı belsendi túrde aǵyla bastady. Bul óz kezeginde Qazaqstan halqy belsendi azamattyq ustanymyn kórsetip jatqanyn, eliniń bolashyǵyna beıjaı qaramaıtynyn baıqatady. Atap aıtqanda, Konstıtýtsııaǵa eleýli ózgerister engizilmek. Bizdiń ókilder baıqaýshy retinde qyzmetin jalǵastyrady», - dedi TMD PAA ókilderi tobynyń úılestirýshisi.

Osy oraıda, ol daýys berý protsesi aıaqtalǵannan keıin barlyq aqparatty jınaqtap, qorytyndy málimetti qoǵamǵa usynatynyn aıtty.

Budan buryn habarlanǵandaı, atalǵan onlaın-marafon kezinde «aldymen ekonomıka nemese saıasat» degen taqyryp talqylanyp, sarapshylar pikir bildirgen edi.