Qazaqstan halqy áıgili ánshi Ermek Serkebaevty sońǵy saparǵa shyǵaryp saldy
ALMATY. 18 qarasha. QazAqparat - Búgin Almatyda qala jurtshylyǵy qazaqstandyq mádenıettiń kórnekti ókili, dańqty ánshi Ermek Serkebaevty sońǵy saparǵa shyǵaryp saldy. Marqummen qoshtasý rásimi onyń búkil shyǵarmashylyq ómiri baılanysty bolǵan Abaı atyndaǵy Qazaq memlekettik akademııalyq opera jáne balet teatrynda ótti.
Budan buryn habarlanǵandaı, Elbasy Nursultan Nazarbaev KSRO jáne Qazaq KSR halyq ártisi, Sotsıalıstik Eńbek Eri E.Serkebaevtyń dúnıeden ótýine baılanysty kóńil aıtý jedelhatyn joldaǵan bolatyn. Memleket basshysynyń jedelhatyn qala ákimi Ahmetjan Esimov oqyp berdi. Ol E.Serkebaevtyń búkil ómiri men shyǵarmashylyǵy Almatymen tyǵyz baılanysty bolǵanyn atap ótti.
Mádenıet jáne aqparat mınıstri Muhtar Qul-Muhammed ańyzǵa aınalǵan ánshi ómirin laıyqty ótkizgenin atap kórsetti. «Ol biregeı tamasha adam boldy - talantty ártis jáne pedagog, jarqyn qoǵam qaıratkeri. Ol táýelsiz Qazaqstannyń qalyptasýyna belsene aralasty, mádenıette ǵana emes, qoǵamdyq ómirdiń basqa da salalarda Memleket basshysynyń bastamalaryna qoldaý kórsetip otyrdy», - dedi M.Qul-Muhammed.
QR Parlamenti Májilisi tóraǵasynyń orynbasary Sergeı Dıachenko ómirden uly ánshi ǵana emes, naǵyz azamat ótti, dep atap ótti. «Ol shynaıy patrıot, memlekettik turǵyda oılaıtyn adam edi», - dedi ol.
«Ol opera óneriniń uly kásipqoıy edi. Onyń jasaǵan sahnalyq obrazdary álemdik mádenıet tarıhyna endi, onyń biregeı oryndaýshylyq qabiletiniń arqasynda qazaqtyń halyq ánderi túrlene tústi. Men úshin ol árqashanda parasatty qamqor aǵa, dos jáne áriptes bolyp qalady», - dedi KSRO halyq ártisi Bıbigúl Tólegenova kózine jas alyp.
Qoshtasý rásiminde sóılegenderdiń bári ulttyq mádenıetimiz qabyrǵasy qaıysqan úlken qazaǵa dýshar bolǵanyn aıtty, óıtkeni Ermek Serkebaev tutas dáýirdi quraǵan daraboz talant ıesi edi, onyń shyǵarmashylyǵy elimizdiń án óneriniń tarıhynda, al esimi - halyq júreginde máńgi saqtalady.
Opera jáne balet teatryna myńdaǵan qarapaıym almatylyqtar keldi. Óner ortasyndaǵy dástúr boıynsha, áıgili ánshini jınalǵandar qol shapalaqtap shyǵaryp saldy. E.Serkebaev «Keńsaı» beıitine jerlendi.
