Qazaqstan halqy Astana qalalyq Assambleıasynyń 13-shi sessııasy ótti
ASTANA. 8 jeltoqsan. QazAqparat - Qazaqstan halqy Astana qalalyq Assambleıasynyń 13-shi sessııasynda tóraǵa orynbasarlary qaıta saılandy.
Bul týraly elorda ákimdiginiń baspasóz qyzmetinen habarlady.
Saılaý nátıjesi boıynsha, Respýblıkalyq uıǵyr mádenı ortalyǵy fılıalynyń basshysy Murat Toqtybaqaev pen Qazaqstannyń koreıler qaýymdastyǵy fılıalynyń basshysy Aleksandr Kım tóraǵa orynbasarlary boldy. Sondaı-aq sessııa nátıjesinde qorytyndy rezolıýtsııa qabyldanyp, ol boıynsha túrli etnos ókilderi ári qaraı da qazaqstandyq qoǵamdaǵy toleranttylyqtyń damýyna yqpal etýge mindetteme aldy.
Kezekti sessııa jumysyn asha otyryp, Astana qalasynyń ákimi, Qazaqstan halqy qalalyq Assambleıasynyń tóraǵasy Imanǵalı Tasmaǵambetov bul ınstıtýttyń el ómirinde alar mańyzdy róline toqtalyp ótti.
Ákim atap kórsetkendeı, búginde elorda turǵyndarynyń qaýymdastyǵyn 130-dan astam etnostar men ulystardyń ókilderi quraıdy. «Olardyń kópshiligi óziniń etnomádenı birlestikterin qurdy. Olardyń sany qazir - 27-ge jetti. Onymen birge, 12 jeksenbilik mektep jumys isteıdi. Munyń barlyǵy etnıkaralyq qatynastardy, dástúrli mádenıet pen eldiń memlekettiligin odan ári damytýǵa berik irgetas qalanǵanyn bildiredi», - dedi ol.
Qazaqstan halqy Assambleıasy tóraǵasynyń orynbasary Eraly Toǵjanovtyń aıtýynsha, Elbasynyń shynaıy iske asqan jobasy bolyp tabylatyn - Astana, jańa saıası jáne qoǵamdyq bastamalardyń ortalyǵyna aınalyp, Qazaqstan úshin ǵana emes, shet memleketter úshin de damý men bir-birine degen toleranttylyq qarym-qatynastyń úlgili modeli bolyp otyr. Táýelsizdiktiń 20 jylynda turaqtylyq, birlik pen beıbitshilik elimiz qol jetkizgen jetistikterdiń basty kepili boldy.
