Qazaqstan halqy Assambleıasynyń ókilderi Prezıdent N.Nazarbaevty kezekten tys saılaýdaǵy jeńisimen quttyqtady

130-dan astam ultty biriktirip otyrǵan etnomádenı birlestikter Elbasyna óz quttyqtaýlaryn jetkizý úshin búgin, Astanadaǵy M.Gorkıı atyndaǵy orys drama teatrynda forým ótkizdi. Quttyqtaýdy QHA Tóraǵasynyń birinshi orynbasary Eraly Toǵjanov oqydy.

Onda QHA ókilderi men etnomádenı birlestikter basshylary Elbasyn, 3 sáýir kúni ótken kezekten tys prezıdenttik saılaýda qol jetkizgen aıqyn jeńisimen quttyqtap, onyń kandıdatýrasyn qoldap ǵalymdar men zııaly qaýym ókilderinen, etnomádenı jáne dinı birlestikter, saıası partııalar men eńbek ujymdarynan, úkimettik emes jáne qoǵamdyq uıymdarmen qatar jastardan quralǵan el azamattarynyń 95,5 paıyzy daýys bergendigin aıtqan.

Quttyqtaýda sondaı-aq: «Daýys berýshilerdiń saılaýǵa qatysýdaǵy belsendiligi - halqymyzdyń ósken el, týǵan jer taǵdyryna jaýapkershilik seziminiń asa joǵary ekendigin kórsetti. Maqsat - shynaıy shyndyq arqyly jeńiske jetý. Al bizder el bolashaǵy men táýelsizdikti nyǵaıtýǵa aýyzbirshiliktiń arqasynda jetken halyqpyz.

Bizder úshin Táýelsizdikten asqan murat, birlikten asqan qasıetti uǵym joq. Biz ótkenin umytpaıtyn elmiz. Ata-baba muratyn ulyqtaıtyn elmiz. Biz Sizdiń sarabdal saıasatyńyzdyń arqasynda halyq muratyn jańa beleske shyǵaryp, óz keleshegimizdi ózimiz kemeldendirgen elmiz. Biz atamekenniń kórkin, ata-jurttyń abyroıyn asyrý jolynda kúsh-jigerimizdi aıamaıtyn elmiz.

Biz Sizdiń bastamańyzben, jańa memlekettiń jańa qoǵamyn, táýelsizdik tarıhyn qalyptastyra otyryp, ózimizdi de jańa ýaqyttyń talabyna saı ózgerte bildik.

Sizge daýys bere otyryp, halqymyz ár aptasy jylǵa tatıtyn jetistikterge qol jetkizdi. Sizdiń salıqaly saıasatyńyzdyń arqasynda babalar armany bolǵan Táýelsizdik ornady, ekonomıkalyq jáne áleýmettik reformalardyń iske asýyn qamtamasyz etken turaqtylyq pen qoǵamdyq kelisim elimizdi álem elderine tanytty.Sizdiń basshylyǵyńyzben, Qazaqstan senimdi jáne nátıjeli tabystarǵa qol jetkizdi. Qadirli Otanymyzdyń ıgiligi artyp, ósip-órkendeý jolyna tústi.

Sizdiń jeńisińiz - bul búkil Qazaqstannyń jeńisi, halyq abyroıynyń asqaqtaýy, qymbat Otanymyz úshin Táýelsizdiktiń 20 jyldyǵyna eń qymbat syıy.

Halqymyz týǵan jerge degen ystyq sezimin, azamattyq paryzyn, jalpyulttyq kelisimdi, berekeli qazaq jerindegi beıbitshilik jáne tynysh ómir úshin óz tańdaýyn jasady.

Biz birge óz taǵdyrymyzdy ózimiz tańdadyq!

Biz Sizdiń basshylyǵyńyzben - bolashaqtyń irgesin birge qalaımyz!», - delingen.