Qazaqstan halqy Assambleıasynyń maqsaty men mindeti qaıta aıqyndaldy

ASTANA. QazAqparat - Búgin Májilistiń jalpy otyrysynda depýtattar «Qazaqstan halqy Assambleıasy týraly»  QR Zańyna ózgerister men tolyqtyrýlar engizý týraly» QR Zańyn maquldady, dep habarlaıdy QazAqparat.

 «Eń áýeli, osy Zańnyń negizin qurap otyrǵan «Etnosaralyq kelisim» termıni onyń qoldanylý aıasyn taryltyp otyr, al is júzinde Assambleıanyń mıssııasy edáýir keń aýqymǵa ıe. Osyǵan baılanysty, Assambleıanyń negizgi maqsaty men mindetterin «etnosaralyq kelisim» dep emes, «qoǵamdyq kelisim men jalpyulttyq birlikti qamtamasyz etý» dep anyqtap, Zańnyń barlyq mátini boıynsha osy termınologııany qoldaný usynylady. Sondaı-aq, usynylyp otyrǵan osyndaı redaktsııalyq túzetý «Qazaqstan halqy Assambleıasy týraly» Zańnyń termınologııasyn Konstıtýtsııamyzdyń normalarymen sáıkestendirip otyr», - dedi zań jobasyn tanystyrǵan QR Mádenıet jáne sport mınıstri Arystanbek Muhamedıuly.

Onyń aıtýynsha, qazirgi ýaqytta Assambleıanyń qurylymdary janynan daýlardy sotqa deıingi retteý maqsatynda medıatsııa kabınetteri ashylyp, jumys istep keledi. Sondaı-aq, elimizdiń barlyq óńirlerinde, sonyń ishinde eldi mekenderde qoǵamdyq kelisim keńesteri qurylǵan. Bul keńesterdiń basty mindeti áleýmettik máselelerdi sheshý jáne qoǵamdaǵy áleýmettik shıelenisterdiń aldyn alý bolyp tabylady. 

«Osy atalǵandy eskere kele zań jobasynda tıisti baptardy kórsete otyryp,  Assambleıanyń qaıyrymdylyqty jáne medıatsııany damytýǵa járdemdesý salasyndaǵy jumysynyń negizgi baǵyttaryn naqtylaý usynylyp otyr. Budan basqa, Assambleıanyń óz ınstıtýtyn nyǵaıtý úshin onyń ınfraqurylymdarynyń qyzmet etýin zańnamalyq turǵydan rettep alý qajettigi týyndaýda.  Osy oraıda, «Qoǵamdyq kelisim» respýblıkalyq memlekettik mekemesiniń, ıaǵnı Assambleıanyń jańa ınstıtýtynyń paıda bolýyn eskere otyryp, sondaı-aq, Assambleıanyń qyzmetindegi etnomádenı birlestikterdiń mańyzdy rólin nazarǵa ala otyryp, zań jobasynda osy atalǵan uıymdardyń mártebesin belgilep alý qarastyrylyp otyr», - dedi ol.

Mınıstrdiń aıtýynsha, Qazaqstan halqy Assambleıasy Keńesiniń rólin jáne onyń qoǵamdyq kelisimdi nyǵaıtý boıynsha memlekettik saıasattaǵy tıimdiligin kúsheıtý maqsatynda Assambleıa Keńesiniń ókilettikterin keńeıtý qajettiligi de týyndady.

«Osyǵan baılanysty, Assambleıa Keńesin respýblıkalyq etnomádenı birlestikterdiń jetekshileri qatarynan qalyptastyrý jáne osy Keńeske qoǵamdyq nagrada taǵaıyndaý quqyǵyn berý usynylady», - dedi Arystanbek Muhamedıuly.

Májilis depýtattary zań jobasyn biraýyzdan maquldap, qaýly qabyldady.