Qazaqstan halqy Assambleıasynyń bizdiń qoǵamymyzdaǵy bedeli men onyń elimizdegi beıbitshilik pen kelisimdi kúsheıtýdegi yqpaly aıtarlyqtaı joǵarylaı tústi

Bul týraly búgin Assambleıa keńesiniń keńeıtilgen otyrysynda QR Memlekettik hatshysy - Syrtqy ister mınıstri Qanat Saýdabaev málim etti, dep habarlaıdy  QazAqparat.

«Álemdik qarjy daǵdarysynyń saldaryna qaramastan qoǵamdyq pikirdiń saýalnamasy málimeti boıynsha Qazaqstandaǵy etnosaralyq qarym-qatynastardyń turaqtylyǵy saqtalýda. Osy oraıda buǵan qazaqstandyqtardyń bekem optımızmi yqpal etýde», dedi Q. Saýdabaev.

 Mınıstrdiń aıtýynsha, júrgizilgen saýalnamaǵa qaraǵanda  naýryz aıymen salystyrǵanda shilde aıynda erteńgi kúnine senimmen qaraıtyndardyń úlesi 11,6 paıyzdan 18,5 paıyzǵa deıin ósken.   Jaǵdaıdyń túzelýine úmit artatyndardyń sany 57 paıyzdan 59,4 paıyzǵa deıin joǵarylaǵan.

Sondaı-aq kúdikpen qaraıtyndardyń úlesi 20,6 paıyzdan 15,6 paıyzǵa deıin tómendegen. Osy oraıda Q. Saýdabaev qazirgi kezde áleýmettanýshylardyń elimizdegi beıbitshilik pen kelisimge azamattardyń oń kózqarasyn joǵary baǵalap otyrǵanyn atap ótti.