Qazaqstan halqy assambleıasyna 25 jyl
Qazaqstan halqy assambleıasy – turaqtylyq pen beıbitshiliktiń jarshysy. Búginge deıin ol uıym kóptegen ıgi isterdiń bastamashysy da bola bilgen. Qazaqstan birliginiń modelin qalyptastyrýda mańyzdy ról atqarǵan assemblıanyń qurylǵanyna 25 jyl tolyp otyr. Osyǵan oraı 2019 jyldyń 28 qarashasynda Beıbitshilik jáne Kelisim saraıynda Qazaqstan halqy assambleıasynyń «Tuńǵysh Prezıdent joly men halyqtyq ekspedıtsııasy» jobasynyń tusaýy kesildi. Bul joba Elbasy Nursultan Nazarbaevtyń atqarǵan jumystaryn qoǵamda keńinen nasıhattaýǵa baǵyttalǵan.
«Shynynda da 2020 jyl – bizdiń memleket úshin óte aıryqsha jyl. Bıyl Qazaqstan halqy assambleıasynyń 25 jyldyǵy. Osy assembleıanyń qurylýynda eń basty róldi oınaǵan bizdiń Tuńǵysh Prezıdentimiz – Elbasymyz. Osy shırek ǵasyrdyń ishinde qıyn da, kúrdeli joldardan óttik. Eń bastysy táýelsizdikten keıingi kezeńde búkil elimizde ómir súrip jatqan barlyq etnos «Birtutas Qazaqstan – bizdiń ortaq Otanymyz» degen uranmen birigip, kelesi jylǵy – Táýelsizdigimizdiń 30 jyldyǵyna úlken qadammen kelip otyr», - dedi QHA Tóraǵasynyń orynbasary Janseıit Túımebaev «Habar» arnasynda «Qoǵamdyq talqylaý» baǵdarlamasynda.
Jalpy Qazaqstan halqy assambleıasynyń 25 jyldyǵyna oraı tolymdy oılar men «Tuńǵysh Prezıdent joly men halyqty ekspedıtsııasy» jobasy týraly málimetterdi baǵdarlamanyń tolyq nusqasynan bilýge bolady.
Qazaqstan halqy assambleıasy Elbasy Nursultan Nazarbaevtyń jeke bastamasymen qurylǵan. Uıymnyń negizgi mindeti - memlekettik saıasatty iske asyrý, memleket jáne azamattyq qoǵam ınstıtýttarynyń etnosaralyq qatynastar salasyndaǵy ózara is-qımylynyń tıimdiligin arttyrý. Nursultan Nazarbaev 1992 jyly Qazaqstan halyqtarynyń forýmynda Qazaqstan halqy Assambleıasyn qurý ıdeıasyn alǵash ret aıtqan bolatyn. Úsh jyldan soń, ıaǵnı 1995 jylǵy 1 naýryzda Qazaqstan Respýblıkasy Prezıdentiniń Qazaqstan halqy assambleıasyn qurý týraly Jarlyǵy shyqty. Onyń mártebesin alǵashynda Qazaqstan Respýblıkasy Prezıdenti janyndaǵy konsýltatıvti-keńesshi organ dep bekitken edi. Óz tarıhynda assambleıa atalǵan mártebeden myqty quqyqtyq negizge jáne qoǵamdyq-saıası mártebege ıe konstıtýtsııalyq organǵa deıin ósti.
2007 jyldyń mamyr aıynda Qazaqstan Respýblıkasy Konstıtýtsııasyna birqatar ózgerister engizildi, budan keıingi jyldardan bastap Qazaqstan halqy assambleıasyna konstıtýtsııalyq mártebe berildi. Sonyń nátıjesinde assambleıa QR Parlamenti Májilisine memleketqurýshy ult qazaqtyń ózin qosqanda toǵyz depýtat saılaý quqyǵyna ıe boldy. Osy arqyly Assambleıanyń qoǵamdyq-saıası róli aıtarlyqtaı artty.
Al 2008 jyldyń 20 qańtarynda elimizdiń Prezıdenti «Qazaqstan halqy assambleıasy» týraly álemde balamasy joq zańǵa qol qoıdy. Sóıtip, Qazaqstan halqy Assambleıasy elimizdiń saıası júıesiniń tolyqqandy bóligine aınaldy. Basynda tek rýhanııat, til jáne mádenıet salasyndaǵy is-sharalarmen ǵana shektelip qalýǵa tıis assambleıa qyzmetiniń normatıvtik-quqyqtyq negizderi aıqyndalyp, saıası ómirge de aralasýǵa bet aldy.
