Qazaqstan halqy Assambleıasy jastar qanatynyń jumysy jandanady

NUR-SULTAN. QazAqparat – Elimizdegi etnomádenı birlestikterdiń jastar qanaty bolyp sanalatyn «Jańǵyrý joly» qozǵalysynyń jumysy jandandyrylady. Bul týraly Memlekettik hatshysy Qyrymbek Kósherbaev Qazaqstan halqy Assambleıasynyń keńeıtilgen otyrysynda aıtty, dep habarlaıdy QazAqparat.

«Assambleıa jumysynyń ekinshi negizgi baǵyty – uıymnyń praktıkalyq sharalaryn, alýan túrli jáne kópformatty áleýmettik jobalaryn Memleket basshysynyń eldi damytýǵa arnalǵan tapsyrmalaryn oryndaýǵa baǵyttaý. Assambleıa qyzmetinde negizgi nazardy mynadaı baǵyttarǵa aýdarý usynylady.

Etnosaralyq salada Assambleıa men memlekettik saıasat júıesin ınstıtýtsıonaldyq jáne ınfraqurylymdyq nyǵaıtýdy jalǵastyrý qajet. Assambleıanyń jalpy jastar quramyndaǵy, etnomádenı birlestikterdiń jastar qanaty – «Jańǵyrý joly» qozǵalysynyń jumysyn jandandyrýǵa erekshe nazar aýdarylatyn bolady», -degen Memlekettik hatshy Assambleıanyń barlyq qoǵamdyq ınstıtýttarynyń jumysy jańa formatta iske asý kerektigin basa aıtty.

«Assambleıa quramyndaǵy qoǵamdyq kelisim keńesiniń, analar keńesiniń, ǵylymı-sarapshylyq keńestiń, jýrnalıster klýbynyń jáne basqa da qurylymdardyń jumysy qaıta suryptalyp, ózektendiriletin bolady», - dedi Qyrymbek Kósherbaev.