Qazaqstan halqy Assambleıasy janynan Metsenattar klýbyn ashý josparlanýda - Z. Balıeva

ASTANA. QazAqparat - Qaıyrymdylyqpen aınalysatyn barlyq kompanııalar men metsenattardyń jumysyn retteý maqsatynda Qazaqstan halqy Assambleıasy janynan Metsenattar klýbyn ashý josparlanýda. Bul týraly búgin Astanada qaıyrymdylyq máselelerine arnalǵan jıynda QR Parlamenti Májilisiniń depýtaty Zaǵıpa Balıeva málim etti.

Onyń aıtýynsha, bıyl qarashada qabyldanǵan «Qaıyrymdylyq týraly» zań boıynsha Qazaqstan halqy Assambleıasynyń bul saladaǵy róli edáýir artpaq.

«Búginde Qazaqstanda qaıyrymdylyq qarajattaryna bilim berý oshaqtary, balabaqshalar, sporttyq alańdar men demalys oryndary salynýda, tómen jaǵdaıly otbasylardyń balalaryna qoldaý kórsetiledi. Sonymen qatar medıtsına mekemeleri boı kóterilip, medıtsınalyq jáne sporttyq jabdyqtar satyp alynýda, talantty balalardy qoldaýǵa granttar bólinip jatyr. Bilim berý salasyna keletin bolsaq, sońǵy úsh jylda Qazaqstan metsenattary 40 mlrd. teńgeden astam qarajat bólgen», - dedi ol.

Depýtattyń atap kórsetkenindeı, qazirgi ýaqytta Qazaqstanda metsenattyq, qaıyrymdylyq jáne erikti qyzmetke halqymyzdyń edáýir bóligi úlesterin qosýǵa tyrysyp keledi.

«Qaıyrymdylyq jobalardyń aýqymy da ósip otyr. On jylda Qazaqstanda qaıyrymdylyq kólemi 60 paıyzǵa joǵarylaǵan. Eger metsenattyq ispen tek 50 jastan asqan kisiler aınalysyp kelgen bolsa, qazir 30 jastan joǵary orta tabysty adamdar da kirip otyr. Elimizde qaıyrymdylyqtyń deńgeıi óskenimen, eldegi áleýmettik salanyń qarqyndy damýy bizdiń aldymyzǵa jańa maqsat-mindetterdi qoıyp otyr jáne onymen biz tek ortaqtasa otyryp, sheshe alamyz. Osyǵan baılanysty, Qazaqstan halqy Assambleıasynyń janynan Metsenattar klýbyn qurý qısyndy bolar edi dep esepteımiz. Ol qaıyrymdylyq qorlar men metsenattardyń qyzmetin bir arnaǵa toǵystyryp, júıeli etýge óz yqpalyn jasaıdy», - dedi Z.Balıeva.