Qazaqstan halqy Assambleıasy Prezıdent saılaýyna baılanysty úndeý jarııalady
Qazaqstan halqy Assambleıasynyń úndeýi
Qurmetti otandastar!
Biz - Qazaqstan halqy - bárimiz birge el ómirindegi taǵdyrsheshti oqıǵanyń qatysýshysy jáne sol oqıǵany jasaýshynyń ózi boldyq.
Kezekten tys ótkizilgen prezıdenttik saılaýda, básekelestik kúrestiń nátıjesinde Qasym-Jomart Kemeluly Toqaev Qazaqstan Respýblıkasynyń Prezıdenti bolyp saılanatyn boldy.
Onyń kandıdatýrasyn Nur Otan partııasynyń kezekten tys XIX sezinde Qazaqstan Respýblıkasynyń Tuńǵysh Prezıdenti - Elbasy, Qazaqstan halqy Assambleıasynyń Tóraǵasy Nursultan Ábishuly Nazarbaev usynǵan bolatyn.
Osylaısha, Elbasynyń Qazaqstandy táýelsizdik jyldarynda tabysty, qalyptasqan jáne udaıy damyp kele jatqan memleketter qataryna qosqan strategııalyq baǵytynyń naqty jáne barshaǵa túsinikti sabaqtastyq tetigi belgilendi. Sonyń arqasynda bárimiz de elimizdiń turaqtylyǵyna, qaýipsizdigi men órleýine senimdimiz.
Qasym-Jomart Toqaev «Barshaǵa ortaq ıgilik! Sabaqtastyq. Ádildik. Órleý» dep tujyrymdalyp, saılaýaldy tuǵyrnamasynda kórinis tapqan bolashaqqa naqty jáne syndarly kózqarasynyń negizinde senimdi jeńiske qol jetkizdi.
Bul tuǵyrnama Qazaqstannyń barsha halqyna arnalǵan. Onda qarapaıym adamdardyń júrek túbindegi tilekteri men kásipkerlerdiń úmitteri, zııaly qaýymnyń umtylystary men azamattyq qoǵamnyń talap-suranystary sol qalyptarynda kórinis tapqan.
Turaqtylyq, tatýlyq pen kelisim, myqty áleýmettik saıasat, ultyna, dinı nanymyna, múliktik jaǵdaıyna qaramastan, bar azamattardyń teńdigi - Qasym-Jomart Toqaev tuǵyrnamasynyń bul basymdyqtaryn árbir azamat júregine jaqyn qabyldap, bar nıetimen qoldady.
Sondyqtan Prezıdent Toqaev el halqy saılaǵan, halyqtyq Prezıdent boldy.
Saılanǵan Prezıdenttiń kandıdatýrasyn elimizdegi barlyq etnomádenı birlestikter biraýyzdan qoldady. Olardyń bastamasy boıynsha «Bizdiń tańdaýymyz - birlik pen kelisim!» Qazaqstan halqynyń forýmy» dep atalatyn aýqymdy, jalpyulttyq aktsııa ótkizildi.
Ol barlyq qazaqstandyq etnostar tarapynan jańadan saılanǵan Memleket basshysyn belsendi túrde qoldaýdyń kórneki, aıqyn kórinisi boldy.
Saılaý nátıjeleri halqymyzdyń asa joǵary saıası mádenıet, azamattyq kemeldik deńgeıin tanytyp, ózderiniń pragmatıkalyq múddeleriniń paıdasyna obektıvti tańdaý jasaǵanyn bultartpaı dáleldedi.
Biz Qazaqstannyń saılanǵan Prezıdenti Q.K.Toqaevtyń budan arǵy jumysynda barlyq saıası partııalar men qoǵamdyq uıymdardyń talap-tilekterine mán berilip, eskeriletine senimdimiz.
Búgin Qazaqstan halqy óz jeńisin toılaýda!
Qazaqstan halqy Assambleıasy barsha azamattardy quttyqtap, memlekettik qurylystyń alda turǵan jańa maqsattary men mindetteriniń aınalasynda toptasýǵa shaqyrady.
Biz táýelsiz Qazaqstandy qarqyndy ekonomıkasy, áleýmettik ádil qoǵamy, barshaǵa arnalǵan teń múmkindikteri men ıgilikteri bar memleket retinde damytý jolyndaǵy ortaq maqsattarymyzǵa qol jetkizý úshin kúsh-jigerimizdi aıamaı jumsaýǵa shaqyramyz.
Bizdiń endigi basty mindetimiz - Prezıdent Q.K.Toqaevtyń saılaýaldy baǵdarlamasyn eldiń ár azamaty sezinetindeı naqty nátıjesi bar salmaqty jáne shynaıy ister retinde júzege asyrý.
Qazaqstan halqy Assambleıasy barlyq saıası partııalarǵa, qoǵamdyq uıymdarǵa bizdiń úndeýimizdi qoldap, Qazaqstan odan ári ıgilikti jáne órkendep damı berýi úshin keń aýqymdy jumys isteýge shaqyrady.
Qazaqstan halqy Assambleıasy,
Nur-Sultan qalasy, 2019 jylǵy 10 maýsym
